रेशम अधिकारी । पश्चिम नवलपरासीको जिल्ला प्रशासन कार्यालयमा तीन हप्तासम्म धाउँदा पनि सेवाग्राहीले नागरिकता पाउन नसकेको खुल्न आएको छ । कार्यालयमा अत्यधिक भिड हुने र नागरिकता बनाउँन पनि हप्तौं कुर्न परेको  सेवाग्राही बताउँछन्  ।

सुनवल नगरपालिका  वडा ७ कि पुनम पाण्डे ३  हप्ता देखि आफ्नो पसल बन्दै गरि जिल्ला प्रशासन कार्यालय  नवलपरासीमा  धाइरहेकीछन् ।उनी पुन:  मंगलबार   बिहान आठ  बजे जिल्ला प्रशासन कार्यालयको  लाईन बसिन् । त्यति बिहानै आउँदा पनि आफू पुग्नुपर्ने फाँटमा पुग्न उनले निकै सकस भएको  बताउँछिन्  । पाण्डेका अनुसार उनले यसरी लाइन लाग्न थालेको ३ हप्ता भैसक्यो  तर अझै नागरिकताको प्रतिलिपि पाउने अत्तोपत्तो छैन ।

पहिलो हप्ता  जाँदा  पालो  आएको छैन  भनी फर्काइयो । दोस्रो  हप्ता टोकन दिइयो र अर्को  हप्ता आउन भनियो । तर यो हप्तामा पनि मेरो काम हुन सकेन पाण्डेयले गुनासो गरिन् ।

जिल्ला प्रशासन कार्यालयको ढिलासुस्तीका कारण आफूहरूले समयमा सेवा पाउन नसकेको उनको गुनासो छ । उनका अनुसार  आफ्नो मान्छेलाई  लाइनमा नबसी  भित्र पठाउने, कर्मचारी, ढिला आउने, र कार्यालयको अव्यवस्थितताले गर्दा जनताले सेवा लिन कठिन भएको छ । ‘आफ्नै देशको नागरिक हुँ भनेर प्रमाणित हुन पनि निकै सकस भोग्नुपरेकोमा उनी मन खिन्न भएको बताउँछिन् ।

यस विषयमा जिल्ला प्रशासन कार्यालयका सूचना अधिकारी जोरासिंह माझीसँग बुझ्दा कर्मचारी अभावका कारण केही समस्या आएको बताए । पहिले नै कर्मचारी कम भएको र केहि सरुवा भएर आउनुपर्ने नआएकोले सेवाग्राहीलाई असहजता भएको उनको भनाइ छ । "कर्मचारी थोरै छौँ, सकेजतिको गरिएकै छ, गर्दागर्दै पनि सम्भव भैरहेको छैन" उनले सेतोमसीसंगको कुराकानीमा भने ।

कर्मचारी ढिलो आउने तथा पहुँचका आधारमा काम हुने सेवाग्राहीको आरोप भने प्रशासन कार्यालयले स्वीकार गरेन । "सेवाग्राहीको काम ढिलो भएपछि उहाँहरूलाई त्यस्तो लागेको हुनसक्छ तर उपलब्ध कर्मचारीले इमानदार प्रयास गरिरहेका छन्" सूचना अधिकारी माझीले भने ।