मौसम

देशभर मौसममा पश्चिमी र स्थानीय वायुको प्रभाव, वर्षा, हिमपात र हावाहुरीको सम्भावना

सेतोमसी
चैत्र ५, २०८१ मंगलवार

देशभर मौसममा पश्चिमी र स्थानीय वायुको प्रभाव, वर्षा, हिमपात र हावाहुरीको सम्भावना

अ +
अ
अ -

काठमाडौं । नेपालमा पश्चिमी वायु तथा स्थानीय वायुको आंशिक प्रभाव रहेको मौसम पूर्वानुमान महाशाखाले जनाएको छ। हाल कोशी, मधेस र बागमती प्रदेशमा आंशिक बदली रहँदा अन्य भूभागमा मौसम मुख्यतया सफा रहेको छ।

आज दिउँसो देशभर आंशिक बदलीदेखि मुख्यतया सफा मौसम रहनेछ। गण्डकी प्रदेशका पहाडी भूभागका एक-दुई स्थानमा चट्याङ्गसहित हल्का वर्षा तथा उच्च पहाडी एवं हिमाली भूभागका केही स्थानमा हल्का हिमपातको सम्भावना रहेको छ। साथै, कोशी र मधेस प्रदेशका केही स्थानमा हावाहुरी चल्न सक्ने अनुमान गरिएको छ।

आज राति कर्णाली तथा सुदूरपश्चिम प्रदेशका पहाडी भूभागमा आंशिक बदली रहनेछ, भने अन्य क्षेत्रमा आंशिक बदलीदेखि मुख्यतया सफा मौसम रहनेछ। उच्च पहाडी तथा हिमाली भूभागका केही स्थानमा हल्का हिमपात हुन सक्नेछ।

अपराह्न समयमा कोशी र मधेस प्रदेशका केही स्थानमा हावाहुरी चल्ने सम्भावना रहेकाले जनजीवन, स्वास्थ्य, सडक तथा हवाई यातायातमा आंशिक प्रभाव पर्न सक्ने भन्दै आवश्यक सतर्कता अपनाउन महाशाखाले अनुरोध गरेको छ।