सहकारी ठगी प्रकरण

रातारात पक्राउ गरिएका रवि लामिछानेलाई आज भैरहवा लगिंदै

सेतोमसी
चैत्र २३, २०८१ शनिवार

रातारात पक्राउ गरिएका रवि लामिछानेलाई आज भैरहवा लगिंदै

फाईल तस्वीर

अ +
अ
अ -

काठमाडौं । सहकारी ठगी प्रकरणमा थुनामा राख्न आदेश दिएपछि राष्ट्रिय स्वतन्त्र पार्टी (रास्वपा) का सभापति रवि लामिछानेलाई आज भैरहवा लगिँदैछ। शुक्रबार राति बूढानीलकण्ठस्थित निवासबाट पक्राउ गरिएका उनलाई अहिले जिल्ला प्रहरी परिसर, काठमाडौंको हिरासतमा राखिएको छ।

तुलसीपुर उच्च अदालतको बुटवल इजलासले शुक्रबार लामिछानेलाई थुनामा पठाउन आदेश दिएको हो। उनले संगठनगत रूपमा सहकारी ठगी गरेको आरोप खेप्दै आएका छन्। अदालतको आदेशसँगै प्रहरी राति नै उनको घर पुगेको थियो।

यसअघि जिल्ला अदालत रुपन्देहीले उनलाई एक करोड धरौटीमा रिहा गर्न आदेश दिएको थियो। तर उच्च अदालतले त्यो आदेश उल्ट्याउँदै थुनै दिनुपर्ने ठहर गरेको हो। बुटवलको सुप्रिम सहकारी प्रकरणसँग जोडिएको यो मुद्दाले अब नयाँ मोड लिएको छ।

रवि लामिछानेका समर्थकहरू यो घटनालाई नियन्त्रित प्रक्रिया भन्दै विरोध गरिरहेका छन् भने रविका आलोचकहरूले न्यायिक निष्कर्ष तर्फ बढेको कदम भनेका छन । तर प्रश्न उठ्छ—सहकारीको नाउँमा ठगिएका सर्वसाधारणले अब न्याय पाउँछन् त? कि फेरि यो पनि राजनीति मै थन्किने हो?