गाजामा मानवीय सहयोगका लागि अन्तर्राष्ट्रिय सहकार्य अपरिहार्य : इजिप्ट

एजेन्सी
चैत्र २७, २०८१ बुधवार

गाजामा मानवीय सहयोगका लागि अन्तर्राष्ट्रिय सहकार्य अपरिहार्य : इजिप्ट

अ +
अ
अ -

काठमाडौं । इजिप्टका रक्षा तथा सैन्य उत्पादन मन्त्री अब्देल मगिद सकरले गाजामा मानवीय संकट समाधानका लागि अन्तर्राष्ट्रिय सहकार्य अपरिहार्य भएको बताएका छन्। मंगलवार फ्रान्सेली सशस्त्र बल मन्त्री सेबास्टियन लेकोर्नुसँगको भेटमा उनले तनाव कम गर्न, नागरिकको जीवनको रक्षा गर्न र प्यालेस्टिनीहरूमाथि मानवीय सहयोगको पहुँच सुनिश्चित गर्न समन्वित प्रयासको आवश्यकता औंल्याएका हुन्।

सैन्य प्रवक्तामार्फत सार्वजनिक गरिएको विज्ञप्तिअनुसार, दुवै मन्त्रीबीच सैन्य सहयोग विस्तार गर्ने विषयमा छलफल भएको थियो। भेटवार्तामा दुई देशबीचको सुरक्षा साझेदारी बलियो बनाउने उपायहरूमाथि विचार विमर्श गर्नुका साथै क्षेत्रीय र अन्तर्राष्ट्रिय परिस्थितिका पछिल्ला घटनाक्रम पनि समेटिएका थिए।

फ्रान्सेली मन्त्री लेकोर्नुले इजिप्टसँगको दीर्घकालीन सैन्य सहकार्यप्रति सन्तोष व्यक्त गर्दै त्यो साझेदारीले रणनीतिक स्थायित्वमा योगदान पुर्‍याएको बताएका थिए।