अर्थ - राजनीति

'अमेरिकी कर नीतिले असर गर्छ, नीतिगत अड्चनले जलविद्युत रोकियो'

सेतोमसी
चैत्र २७, २०८१ बुधवार

'अमेरिकी कर नीतिले असर गर्छ, नीतिगत अड्चनले जलविद्युत रोकियो'

अ +
अ
अ -

काठमाडौं । नेपाल चेम्बर अफ कमर्शका अध्यक्ष कमलेश अग्रवालले अमेरिकाले बढाएको विश्वव्यापी करको असर नेपालमा पनि पर्ने बताएका छन् । उनले भारतको अर्थतन्त्रमा पर्ने असरको सिधा असर नेपाली अर्थतन्त्रमा पनि देखिने स्पष्ट पारे ।

बुधवार काठमाडौंमा सम्पन्न चेम्बरको ७४ औँ वार्षिक साधारणसभामा बोल्दै उनले नेपालको विदेशी विनिमय दर भारतीय रुपैयाँसँग स्थिर भएकाले भारतमा पर्ने झट्काको चेन इफेक्ट नेपालमा पनि देखिने बताए ।

उनले नेपाल उज्यालो युगमा पुगे पनि जलविद्युत क्षेत्रमा नीतिगत अड्चनका कारण ठूला आयोजना अल्झिएको बताए । सरकारबाट ५० भन्दा बढी जलविद्युत आयोजनाको आईपीओ रोकिएको, अदालतको फैसला र वन मन्त्रालयका निर्देशनले प्रसारण लाइन निर्माणमा अवरोध भएको, अनि यसबाट लगानीकर्ताको करोडौं रुपैयाँ जोखिममा परेको उनको भनाइ थियो ।

अध्यक्ष अग्रवालका अनुसार, ऊर्जा विधेयकका केही प्रावधान र प्रशासनिक झन्झटले जलविद्युत आयोजनाहरु बन्नै नसक्ने अवस्था आएको छ । आईपीओ रोकिँदा आयोजना निर्माणमा वित्तीय संकट देखिएको र यो समस्या समाधानका लागि संसदबाट विधेयक संशोधन गर्नुपर्ने उनले बताए ।

त्यस्तै, उनले पर्यटन क्षेत्र पनि नेपालको अर्थतन्त्रको मेरुदण्ड बन्ने उल्लेख गर्दै रामायण पथ र बुद्ध सर्किटको प्रभावकारी कार्यान्वयन गरी चीन र भारतबाट धार्मिक पर्यटक भित्र्याउन सरकार गम्भीर हुनुपर्नेमा जोड दिए ।