दुर्घटना अपडेट

पाथीभरा दर्शनका लागि गएको गाडी दुर्घटना: ४ जनाको मृत्यु, २ घाइते

सेतोमसी
बैशाख ८, २०८२ सोमवार

पाथीभरा दर्शनका लागि गएको गाडी दुर्घटना: ४ जनाको मृत्यु, २ घाइते

अ +
अ
अ -

एलिना दियाली, ताप्लेजुङ । ताप्लेजुङको फुङलिङ नगरपालिका १० स्थित काफ्लेपाटी सडक खण्डमा पाथीभरा दर्शनका लागि जाँदै गरेको बलेरो गाडीमा करेन्ट लागेर आगलागी हुँदा ४ जनाको ज्यान गएको छ। फुङलिङ नगरपालिका १० गुन्द्रे र तेर्सेको छेउमा सडकमा बिजुलीको तार झरी उक्त गाडीमा आगो लागेको थियो।

जिल्ला प्रहरी कार्यालय ताप्लेजुङका सूचना अधिकारी र प्रहरी निरीक्षक विवेक बस्नेतका अनुसार, घटनामा मृत्यु हुनेमा फुङलिङ नगरपालिका १० का ४२ वर्षीय सवारी चालक दुर्गा भट्टराई, ललितपुर जिल्लाकी १६ वर्षीया आध्या आचार्य, झापा जिल्लाकी ६९ वर्षीया सरिता पौडेल, र उनका श्रीमान् झापाकै ७० वर्षीय विनोद पौडेल रहेका छन्।

गाडीमा ६ जना सवार थिए, जसमा अन्य घाइते ललितपुरकी ४५ वर्षीया सविना आचार्य र उनका छोरा अभियम आचार्य रहेका छन्। उनीहरूलाई उपचारका लागि जिल्ला अस्पताल लगिएको छ। घाइते सविनाको अवस्था गम्भीर रहेको र छोरा अभियमको अवस्था मध्यम रहेको प्रहरीले जनाएको छ।