योजनाविहीन शहरीकरणले समस्यामा पार्‍यो : परराष्ट्रमन्त्री राणा

सेतोमसी
बैशाख ८, २०८२ सोमवार

योजनाविहीन शहरीकरणले समस्यामा पार्‍यो : परराष्ट्रमन्त्री राणा

अ +
अ
अ -

काठमाडौं । परराष्ट्रमन्त्री डा. आरजु राणा देउवाले शहरीकरण विकास र अवसरको इन्जिन भए पनि योजनाविहीन र अव्यवस्थित शहरी विस्तारले एशिया तथा प्रशान्त क्षेत्रलाई गम्भीर संकटमा पारेको बताएकी छन्। उनले वातावरणमैत्री, समावेशी र दिगो शहरी योजनाका लागि अहिले नै ठोस नीति र लगानी आवश्यक रहेको औंल्याएकी छन्।

संयुक्त राष्ट्रसंघीय एशिया तथा प्रशान्त क्षेत्रीय आर्थिक तथा सामाजिक आयोग (UNESCAP) को ८१ औँ सत्रलाई सोमबार बैंककमा सम्बोधन गर्दै मन्त्री राणाले भोलिको पुस्ताको भविष्य सुरक्षित गर्न अहिलेका शहरहरू परिवर्तन गर्नुपर्ने धारणा राखेकी हुन्।

शहरीकरणका कारण वातावरणीय दबाब, पूर्वाधार अभाव, सामाजिक असमानता, वित्तीय जोखिम र डिजिटल विभाजनजस्ता चुनौतीहरू देखिएको उल्लेख गर्दै उनले यस समस्यालाई दिगो समाधान गर्न 'हरित र समावेशी' विकास मोडलमा जोड दिइन्। उनले भनिन्, “शहरहरू केवल भवन र बाटाहरूको जमघट होइनन्, ती नवप्रवर्तन र सम्भावनाका केन्द्र हुन्, तर त्यसका लागि रणनीतिक लगानी र नीति चाहिन्छ।”