१४ महिनापछि राजीनामा दिन्छु, शेरबहादुरजी प्रधानमन्त्री बन्नुहुन्छः ओली

सेतोमसी
बैशाख १२, २०८२ शुक्रवार

१४ महिनापछि राजीनामा दिन्छु, शेरबहादुरजी प्रधानमन्त्री बन्नुहुन्छः ओली

अ +
अ
अ -

काठमाडौं । प्रधानमन्त्री केपी शर्मा ओलीले दिएको राजीनामासम्बन्धी अभिव्यक्तिले नेपाली राजनीतिमा नयाँ तरंग ल्याएको छ । संसद् भवन परिसरमा सञ्चारकर्मीहरूसँग कुराकानी गर्दै उनले अब १४ महिनापछि प्रधानमन्त्री पदबाट राजीनामा दिने र त्यसपछि नेपाली काँग्रेसका सभापति शेरबहादुर देउवा प्रधानमन्त्री बन्ने सार्वजनिक रूपमा बताएका छन् ।

ओलीले हाँसोसहित प्रतिक्रिया दिँदै भने, “अब १४ महिनापछि मैले राजीनामा गर्छु, शेरबहादुरजी प्रधानमन्त्री हुनुहुन्छ ।” यो भनाइलाई कतिपयले सामान्य ठट्टा ठानेपनि नेपाली राजनीतिमा सन्देश प्रवाहको एउटा शैलीको रूपमा पनि बुझिएको छ ।

सरकार परिवर्तनको चर्चा चुलिएको बेला सञ्चारकर्मीहरूले प्रधानमन्त्री ओलीसँग जिज्ञासा राखेका थिए। त्यसैक्रममा आएको यो अभिव्यक्तिलाई सत्तारूढ गठबन्धनभित्रको रणनीतिक इशारा पनि मानिएको छ ।

यसैबीच माओवादी केन्द्रका अध्यक्ष पुष्पकमल दाहाल प्रचण्डले पार्टीको संसदीय दल बैठकमा काँग्रेस सभापति देउवा थाइल्याण्डबाट फर्किएपछि गठबन्धनका विषयमा छलफल गर्ने जानकारी गराएका थिए । देउवा शुक्रवार थाइल्याण्डबाट फर्किदा सञ्चारकर्मीहरूसँग छोटो प्रतिक्रिया दिंदै भने, “गठबन्धन सरकार पूरा समयसम्म चल्नेछ ।”

सत्तापक्ष र प्रतिपक्ष दलका यी नेताहरुको भनाइले सत्ता गठबन्धन र प्रतिपक्ष दलहरु सत्ताको छिनाझम्टीमा राम्रैसंग लागेको पुष्टि हुन्छ ।