स्पेन र पोर्चुगलमा विद्युत् अवरुद्ध हुँदा ७ जनाको मृत्यु

सेतोमसी
बैशाख १७, २०८२ बुधवार

स्पेन र पोर्चुगलमा विद्युत् अवरुद्ध हुँदा ७ जनाको मृत्यु

अ +
अ
अ -

एजेन्सी । स्पेन र पोर्चुगलमा सोमबार भएको एक व्यापक विद्युत् अवरुद्धतासँग सम्बन्धित घटनामा सात जनाको ज्यान गएको छ। विभिन्न स्थान र परिस्थितिमा भएका यी घटनाहरू सम्भावित रूपमा सोही ब्ल्याकआउटसँग सम्बन्धित रहेको स्पेनिस अधिकारीहरूले जनाएका छन्।

स्पेनको सिभिल गार्डका अनुसार ग्यालिसियाको उत्तरपश्चिमी क्षेत्र टाबोआडेलास्थित एक घरमा ८१ र ७७ वर्षका एक वृद्ध दम्पती र उनीहरूको ५६ वर्षीय छोराको शव फेला परेको हो। प्रारम्भिक अनुसन्धानले घर बाहिर राखिएको जेनेरेटरबाट निस्किएको धुवाँका कारण कार्बन मोनोअक्साइड विषाक्तताबाट उनीहरूको मृत्यु भएको आशंका गरिएको छ। तीमध्ये एक व्यक्तिलाई श्वासप्रश्वासमा समस्या थियो र कहिलेकाहीँ अक्सिजन सपोर्ट आवश्यक पर्ने बताइएको छ।

सोमवार राति म्याड्रिडको काराबान्चेल छिमेकस्थित एउटा अपार्टमेन्ट ब्लकमा आगलागी हुँदा ५२ वर्षीय एक पुरुषको मृत्यु भएको छ। आगलागीमा परेर अन्य १३ जना घाइते भएका छन्।

त्यसैदिन ग्यालिसियाका तीन अन्य स्थानमा आपूर्ति अवरुद्धतासँग अप्रत्यक्ष रूपमा सम्बन्धित थप तीन जनाको मृत्यु भएको पुष्टि गरिएको छ। फेरोलमा ५९ वर्षीय एक पुरुष मृत फेला परे, जो पहिलेदेखि नै स्वास्थ्य समस्याबाट पीडित थिए। बेटान्जोसमा ८० वर्षीय र डुम्ब्रियामा ८६ वर्षीय पुरुषको मृत्यु भएको जनाइएको छ।

विद्युत् आपूर्ति अवरुद्ध सोमवार दिउँसो भएको थियो। यसको कारण खुल्न बाँकी छ। प्रधानमन्त्री पेड्रो सान्चेजले घटनाको गम्भीर अनुसन्धान गर्ने र भविष्यमा यस्ता समस्या रोक्न आवश्यक कदम चालिने बताएका छन्।