काठमाडौं । भारतीय सेनाले पाकिस्तान र पाकिस्तान अधिनस्थ जम्मु–कश्मीरमा रहेका 'आतंकवादी' शिविरहरूमा सोमबार मध्यराति 'एयर स्ट्राइक' गरेको छ। 'अपरेशन सिन्दूर' नाम दिइएको उक्त कारबाही अन्तर्गत भारतीय सेनाले नौ स्थानमा हवाई आक्रमण गरेको भारतीय सञ्चारमाध्यम दैनिक भास्करले जनाएका छन्।

भारतीय सेनाले 'आतंकवादी शिविर'हरूलाई मात्र लक्षित गरिएको जनाएको छ भने पाकिस्तानको सैन्य संरचनालाई भने आक्रमणबाहिर राखिएको उल्लेख गरिएको छ।

हमलाको पृष्ठभूमि कश्मीरको पहलगाममा अप्रिल २२ मा भएको आक्रमण हो । जुन हमलामा एक नेपालीसहित २६ जना पर्यटकको ज्यान गएको थियो। रिपोर्टहरूका अनुसार आक्रमणकारीहरूले धर्मको पहिचान गरेपछि पर्यटकहरूलाई गोली प्रहार गरेका थिए।

भारतीय राष्ट्रिय अनुसन्धान एजेन्सी (एनआईए) ले पहलगाम घटनाको अनुसन्धान गरिरहेको छ र यस विषयमा अप्रिल २७ मा जम्मुमा मुद्दा दर्ता गरिएको छ।

यसअघि, अप्रिल २३ मा भारतीय विदेश सचिव विक्रम मिश्रीले पाकिस्तानका नागरिकहरूलाई दिइएको १४ प्रकारका भिसा रद्द गरिएको जानकारी दिएका थिए। जसअनुसार सार्क भिसा धारकहरूलाई अप्रिल २६ सम्म भारत छोड्न भनिएको थियो भने मेडिकल भिसा हुनेहरूलाई अप्रिल २९ सम्मको समय दिइएको थियो। अन्य श्रेणीका भिसा धारकहरूलाई अप्रिल २७ सम्मको समय दिइएको थियो।

यसैबीच, भारतीय सञ्चारमाध्यम एबीपी न्यूजले भारतीय सेनाले पहलगाम घटनाको ‘बदला’ स्वरूप एयर स्ट्राइक गरेको दाबी गरेको छ।

उता, पाकिस्तानी सेनाका प्रवक्ता लेफ्टिनेन्ट जनरल अहमद शरीफ चौधरीले भारतले कोटली, बहावलपुर र मुजफ्फराबादमा ‘कायरतापूर्ण मिसाइल आक्रमण’ गरेको आरोप लगाएका छन्।