सत्ता

सरकारमा जान तँछाडमछाड गरेका छैनौं : माओवादी सचिव पौडेल

सेतोमसी
बैशाख २६, २०८२ शुक्रवार

सरकारमा जान तँछाडमछाड गरेका छैनौं : माओवादी सचिव पौडेल

अ +
अ
अ -

काठमाडौं । नेकपा (माओवादी केन्द्र)का सचिव देवेन्द्र पौडेलले सरकारमा जाने कुनै योजना नरहेको बताएका छन् । शुक्रवार बसेको प्रतिनिधिसभाको बैठकपछि संसद भवन परिसरमा सञ्चारकर्मीहरूसँगको कुराकानीमा उनले सरकारमा जानको लागि आफूहरूले तँछाडमछाड नगरेको समेत स्पष्ट पारे ।

सचिव पौडेलले वर्तमान सरकार जनताको निम्ति नभई आफ्ना मान्छेहरूलाई विभिन्न निकायमा व्यवस्थापन गर्न बनेको आरोप लगाए । उनले सत्ता गठबन्धन भित्रै एक मत नरहेको टिप्पणी समेत गरे । पौडेलले नीति तथा कार्यक्रममा सरकारमै रहेकाहरूले एक स्वरले समर्थन जनाउन नसकेको बताए । उनले विद्युत प्राधिकरणको विषय र गभर्नर नियुक्तिको कुरामा पनि सत्ता गठबन्धनमा रहेकाहरू एक स्वरले बोल्न नसकेको जिकिर गरे ।

‘अहिले सरकारमा जाने कुरा छैन । सरकारमा जानको लागि हामीले तँछाडमछाड पनि गरेका छैनौं । नीति तथा कार्यक्रम आयो, एक स्वरले उहाँहरूले समर्थन गर्न सक्नुहुन्न । प्राधिकरणको कुरा आयो, एक स्वरले उहाँहरू बोल्न सक्नुहुन्न । गभर्नर नियुक्तिको कुरा आयो, उहाँहरू एक स्वरले बोल्न सक्नुहुन्न ।’ उनले भने, ‘यसले देखाउँछ भने उहाँहरू सरकारको निम्ति सरकार, जनतालाई सरकार होइन, सरकारको निम्ति सरकार र आफ्नो मान्छेहरूलाई सेट गर्नको लागि सरकार बनेको प्रस्ट छ ।’