इन्धन संकट

गाजामा इन्धन संकट, प्लास्टिक फोहोरबाट डिजेल उत्पादन गरिदै

सेतोमसी
बैशाख २७, २०८२ शनिवार

गाजामा इन्धन संकट, प्लास्टिक फोहोरबाट डिजेल उत्पादन गरिदै

अ +
अ
अ -

काठमाडौं । पश्चिमी गाजा सहरको भग्नावशेषबीच साद अल-दिन अबु अजवाले अस्थायी कार्यशाला सञ्चालन गरिरहेका छन्। यस कार्यशालामा प्लास्टिकको फोहोरबाट दैनिक करिब ५ सय लिटर डिजेल उत्पादन गरिन्छ। हरेक दिन कामदारहरूले फालिएका प्लास्टिकका वस्तुहरू संकलन गरी ठूला धातुका कन्टेनरहरूमा पगाल्छन्। इजरायलको नाकाबन्दीले सिर्जना गरेको इन्धन अभाव पूर्ति गर्न फोहोरलाई इन्धनमा परिणत गर्दै आएका छन्।

अक्टोबर ७, २०२३ मा गाजामा द्वन्द्व सुरु भएयता इजरायलले सहायता आपूर्तिमा प्रतिबन्ध लगाएको छ। संयुक्त राष्ट्र संघका एजेन्सीहरूको अनुसार युद्ध सुरु भएयता गाजामा इन्धनको आपूर्ति अत्यन्त न्यून भएको छ। इन्धनको कमीले गर्दा अस्पतालहरूले प्राथमिकता पाएका छन् भने सर्वसाधारणका लागि इन्धन स्टेसनहरू बन्द छन्। यसले बासिन्दाहरूलाई सुधारिएको विकल्प वा कालो बजारमा निर्भर हुन बाध्य बनाएको छ।

अबु अजवाको कार्यशालामा उत्पादन भएको इन्धन प्रतिलिटर १४ डलरमा बेचिन्छ, जुन आयातित डिजेलभन्दा निकै सस्तो छ। गाजाका बासिन्दाहरूका लागि यो इन्धन जीवनरक्षाको अस्थायी माध्यम बनेको छ। टुक-टुक, जेनेरेटर, र पानी पम्पहरूका लागि बिजुली दिन इन्धन सिधै बिक्री गरिन्छ। तर, प्लास्टिकको स्रोतसमेत सकिदै गएको छ, जसले स्थानीय उत्पादनलाई चुनौती थपेको छ।

स्थानीय बासिन्दा सुकर भन्छन्, “यो इन्धनको लागत अझै उच्च छ तर आयातित डिजेलभन्दा सस्तो भएकाले ढुवानी लागतमा कमी आएको छ।” इन्धन अभावका बीच स्थानीय रूपमा उत्पादित डिजेल गाजाका बासिन्दाहरूको जीवनयात्रालाई केही हदसम्म सहज बनाउन सहयोगी बनेको छ।