बजेट

बजेट विनियोजन ठिक ढङ्गले नहुनु मुल समस्याः पूर्वअर्थमन्त्री महत

सेतोमसी
बैशाख २८, २०८२ आइतवार

बजेट विनियोजन ठिक ढङ्गले नहुनु मुल समस्याः पूर्वअर्थमन्त्री महत

अ +
अ
अ -

काठमाडौं । पूर्वअर्थमन्त्री डा. प्रकाशशरण महतले मुलुकको अर्थतन्त्रमा देखिएको समस्या बजेट विनियोजन र कार्यान्वयनमा रहेको बताएका छन्। आईतबार प्रतिनिधिसभा बैठकपछि संसद् परिसरमा पत्रकारहरूसँग कुरा गर्दै महतले बजेटको प्राथमिकता निर्धारणमा कमजोरी भएको औँल्याए।

उनले भने, "खर्च गर्नुपर्ने स्थानमा खर्च नभएको र खर्च नगर्नुपर्ने ठाउँमा बढी खर्च भएको स्थिति अर्थतन्त्रको मुख्य चुनौती बनेको छ।"

उनले सरकारको आर्थिक व्यवस्थापनको कमजोरीको रूपमा बजेट विनियोजनमा प्राथमिकता निर्धारणको अभावलाई प्रमुख समस्या माने। महतले अध्ययन भएका आयोजना र प्राथमिकतामा आधारित बजेट विनियोजनको प्रतिबद्धता सरकारले गरेको बताउँदै यसलाई कार्यान्वयनमा ल्याउन गम्भीर गृहकार्य आवश्यक रहेको धारणा राखे।

नेपाली काँग्रेसका प्रवक्ता समेत रहेका महतले सीमित स्रोत र साधनको दुरुपयोग रोक्न र प्रभावकारी कार्यान्वयनका लागि अर्थमन्त्रीको दृढता अपरिहार्य रहेको बताए।

सरकारले प्रस्तुत गरेको नीति तथा कार्यक्रम सकारात्मक देखिए पनि कार्यान्वयनमा चुनौतीहरू रहेको उनको भनाई छ।