बर्षातले पाकेको धानसंगै डुवायो किसानको बर्षदिनको मेहनत

रेशम अधिकारी
कार्तिक १, २०७८ सोमवार

बर्षातले पाकेको धानसंगै डुवायो किसानको बर्षदिनको मेहनत

अ +
अ
अ -

रेशम अधिकारी, सेतोमसी डेस्क । लटरम्म फलेको धान पाकेर थन्क्याउने बेला भएको अवस्थामा बर्षाले क्षति पुर्याएपछि देशैभरीका किसान चिन्तित भएका छन् ।

बर्षातले काटेको धानलाई डुबाउनुको साथै पाकिसकेको तर नकाटिएको धानको बाला समेत झारेको छ । बाली भित्र्याउने समयमा पानीले क्षति पुर्‍याइ दिएपछि आफ्नो बर्षभरीको मेहनत खेर गएको भन्दै रुन मात्र नसकेको सुनवल नगरपालिका– ७ सिसाहानिका किसान प्रकाश न्यौपाने बताउँछन् ।

त्यसो त देशैभरी परेको बर्षात नवलपरासी मात्रै नभएर देशै भरिका किसानलाई उत्तिकै पिडा दिएको छ । देवदहका किसान कालिका अर्याल बर्षातमा कारण आफू राम्रोसँग निदाउन पनि नसकेको बताउँछिन् । जसरी खेतमा धान भिजेको त्यसैगरी किसानका आँखा पनि भिजेका छन् भन्दै अर्यालले अब वर्षभरि खाने अन्नको चिन्ताले मन पिरोल्न थालेको बताउँछिन् ।

यता पाल्पाको सबैभन्दा ठूलो फाँट माडिको पनि अवस्था उस्तै छ । पाल्पाबाट सेतोमसीकर्मी सुमन गाहाले पठाएको रिपोर्ट अनुसार बर्षाले खेतमा धान चुर्लुम्मै डुबेको छ । धानसंगै आफुहरूको बर्षदिनको मेहनत पनि डुबेको पाल्पाली किसानहरूले बताएका छन् ।

त्यसैगरी, रातिदेखि आएको अविरल वर्षाका कारण सडक हिलाम्यै भएको र कैयौं स्थानमा सडक अवरुद्ध समेत भएकोले दसैंका लागि घर आएका व्यक्तिलाई फर्किन समस्या भएको छ ।