विद्यालय शिक्षा विधेयक

विद्यालय शिक्षा विधेयक उपसमितिको प्रतिवेदन तयार, दुई विषय थाती

सेतोमसी
जेठ ३१, २०८२ शनिवार

विद्यालय शिक्षा विधेयक उपसमितिको प्रतिवेदन तयार, दुई विषय थाती

अ +
अ
अ -

काठमाडौं । विद्यालय शिक्षा विधेयक माथि बनेको संघीय संसदको उपसमितिले प्रतिवेदनलाई अन्तिम रूप दिएको छ । तर निजी विद्यालय र प्रारम्भिक बाल विकाससँग सम्बन्धित विषय भने समितिमै थप छलफल गरेर मात्र टुंग्याउने निष्कर्ष निकालिएको छ ।

शनिबार बसेको शिक्षा, स्वास्थ्य तथा सूचना प्रविधि समितिको बैठकमा बोल्दै उपसमिति संयोजक छविलाल विश्वकर्माले जिम्मेवार पक्षसँगको अनवरत संवादपछि प्रतिवेदन तयार पारिएको जानकारी गराए । सरकारसँग भएका सम्झौता र सहमति विधेयकमा समेटिनुपर्छ भन्ने धारणा अनुरूप उपसमितिले सम्बन्धित मन्त्रालयसँग आवश्यक विषय माग गरेर काम अघि बढाएको उनले सुनाए ।

उपसमितिले पाएको जिम्मेवारी, त्यसबेला रहेको परिवेश र उपलब्ध आधारलाई मध्यनजर गर्दै प्रतिवेदन तयार पारिएको उनले बताए । ‘सम्झौता र सहमतिहरू अन्त्यहीन रूपमा दोहोरिरहने हो भने विधेयकको काम कहिल्यै सकिँदैन,’ विश्वकर्माले भने, ‘शिक्षक महासंघको दबाबका बीच काम अघि बढाइयो । केही संवादमा हामीलाई समेत सहभागी नगरिने वातावरण बन्यो । त्यसैले संवादको शैलीप्रति पनि प्रश्न उठ्यो ।’

उनले विधेयकको कार्यान्वयनको पाटो सुनिश्चित गर्न उपसमितिले समयसीमा भित्रै काम सम्पन्न गर्नुपर्ने बाध्यता रहेको बताए । तर निजी विद्यालय र बाल विकासजस्ता विषय फराकिलो छलफल माग गर्ने भएकाले ती बुँदा समितिमा नै विस्तृत रूपमा उठाउने निर्णय गरिएको उनले स्पष्ट पारे ।

‘यी विषयलाई खण्ड–खण्डमा नटुक्र्याई संस्थागत ढंगले टुंग्याउनु जरुरी छ,’ उनले भने, ‘त्यसैले बाँकी विषय समितिमा राखेर यो प्रतिवेदन बुझाइएको हो ।’