मौसम

देशभर वर्षाको सम्भावना, सतर्कता अपनाउन आग्रह

सेतोमसी
आषाढ १०, २०८२ मंगलवार

देशभर वर्षाको सम्भावना, सतर्कता अपनाउन आग्रह

अ +
अ
अ -

काठमाडौँ । आगामी २४ घण्टामा देशका विभिन्न स्थानमा मेघगर्जन र चट्याङ्गसहित हल्कादेखि मध्यम वर्षा हुने सम्भावना रहेको मौसम पूर्वानुमान महाशाखाले जनाएको छ ।

कोशी, बागमती, गण्डकी, लुम्बिनी र सुदूरपश्चिम प्रदेशका धेरै स्थानहरू तथा अन्य प्रदेशका केही भू-भागहरूमा वर्षा हुने अनुमान गरिएको छ ।

यस्तै, वर्षासँगै नदी नाला र खोलानालाहरूमा पानीको सतह बढ्ने, आकस्मिक बाढी, भूक्षय, पहिरो तथा गेड्गाँड बहाव जस्ता प्रकोपहरू हुन सक्ने सम्भावना रहेकोले महाशाखाले सतर्कता अपनाउन सबैमा आग्रह गरेको छ ।

कोशी प्रदेशको हिमाली, पहाडी र तराई भू-भागमा भारीदेखि अति भारी वर्षा हुने सम्भावना छ भने बागमती र गण्डकी प्रदेशका हिमाली, पहाडी र तराई क्षेत्रहरूमा पनि साधारण बदलीका साथ हल्कादेखि मध्यम वर्षा हुने देखिएको छ ।

मधेश प्रदेशको तराई क्षेत्रमा आंशिक बदली रही केही स्थानमा वर्षा हुन सक्नेछ ।

लुम्बिनी, कर्णाली र सुदूरपश्चिम प्रदेशका हिमाली, पहाडी र तराई भू-भागहरूमा पनि आंशिकदेखि साधारण बदली रही थोरै स्थानमा चट्याङ्गसहित वर्षाको सम्भावना महाशाखाले जनाएको छ ।