युद्धमा मारिएका ६० इरानी सैनिक अधिकारी र वैज्ञानिकहरूको अन्तिम संस्कार

एजेन्सी
आषाढ १४, २०८२ शनिवार

युद्धमा मारिएका ६० इरानी सैनिक अधिकारी र वैज्ञानिकहरूको अन्तिम संस्कार

अ +
अ
अ -

काठमाडौँ । इजरायलसँगको १२ दिने युद्धमा मारिएका ६० इरानी अधिकारीहरूको अन्तिम संस्कार शनिवार गरिएको छ । यसमा ३० सैन्य कमाण्डर र ११ आणविक वैज्ञानिकहरू सामेल छन् । उनीहरूको अन्त्येष्टिको लागि हजारौं मानिसहरू तेहरानमा भेला भएका थिए ।

इरानका सर्वोच्च सैन्य अधिकारी मोहम्मद बघेरीको पनि अन्तिम संस्कार गरिएको छ । उनी इरानको सशस्त्र सेनाका प्रमुख थिए । अधिकारीहरूको शवलाई सवारी साधनहरूमा इरानी झण्डाले बेरिएको कफिनमा राखिएको थियो । अधिकारीहरूको तस्बिर पनि कफिनसँगै राखिएको थियो ।

इरानका विदेशमन्त्री अब्बास अराक्ची, संसदका सभामुख मोहम्मद बाकर कालिबाफ, न्यायपालिका प्रमुख मोहसेनी-एजेई, आईआरजीसी कुड्स फोर्स कमाण्डर इस्माइल कानी र अन्य धेरै ठूला नेताहरू र सैन्य अधिकारीहरू पनि अन्त्येष्टिमा पुगेको इरानी मिडियाले उल्लेख गरेका छन् ।

इरान र इजरायलबीच जुन १२ मा युद्ध सुरु भएको थियो । अमेरिकाले जुन २२ मा इरानको आणविक अड्डाहरूमा आक्रमण गर्‍यो र त्यसको दुई दिन पछि, जुन २४ मा, इरान र इजरायलबीच युद्धविराम भएको थियो ।