मौसम

मनसुनी वायु सक्रिय : डुबान, बाढी र पहिरोको खतरा

सेतोमसी
आषाढ २६, २०८२ बिहिवार

मनसुनी वायु सक्रिय : डुबान, बाढी र पहिरोको खतरा

अ +
अ
अ -

काठमाडौं । देशभर मनसुनी वायुको प्रभाव सक्रिय रहेको छ । मौसम पूर्वानुमान महाशाखाका अनुसार मनसुनको न्यून चापीय रेखा पूर्वी नेपालमा सरदर स्थानको आसपास तथा पश्चिमतर्फ सामान्य भन्दा उत्तरतिर सरेको छ ।

हाल बागमती, गण्डकी, लुम्बिनी, कर्णाली र सुदूरपश्चिम प्रदेशमा सामान्यतया बदली छ भने कोशी, मधेश र अन्य केही प्रदेशमा आंशिक बदलीसहित मौसम खुलेको छ । कोशी, कर्णाली र सुदूरपश्चिमका थोरै स्थानमा तथा अन्य केही स्थानमा मेघगर्जनसहित हल्का देखि मध्यम वर्षा भइरहेको छ ।

महाशाखाका अनुसार आज दिउँसो देशभर आंशिकदेखि सामान्य बदली रहनेछ । देशका पहाडी भू-भागका केही स्थानमा र अन्य स्थानका थोरै भागमा मेघगर्जन, चट्याङसहित हल्का देखि मध्यम वर्षाको सम्भावना छ ।

गण्डकी, कर्णाली र सुदूरपश्चिम प्रदेशका एक–दुई स्थानमा भारी वर्षा हुने पूर्वानुमान गरिएको छ । त्यस्तै, उच्च पहाडी र हिमाली भूभागका थोरै स्थानमा हल्का देखि मध्यम वर्षा वा हिमपातको सम्भावना पनि महाशाखाले जनाएको छ ।

आगामी २४ घण्टामा सम्भावित वर्षाका कारण बाढी, पहिरो, डुबान र गेग्रान बहावको जोखिम रहने देखिएको छ । यसले शहरी तथा तराई क्षेत्र प्रभावित हुन सक्ने, ठूला–साना नदी, नाला र खोलामा पानीको सतह बढ्ने सम्भावना रहेको उल्लेख गरिएको छ ।

साथै, दैनिक जनजीवन, कृषि, स्वास्थ्य, पर्यटन, निर्माण कार्य, सडक तथा हवाई यातायातमा असर पर्ने भएकाले सतर्कता र पूर्वतयारी अपनाउन महाशाखाले सबैलाई आग्रह गरेको छ ।