उपनिर्वाचन

रुपन्देही–३ उपनिर्वाचन : दल दर्ता गर्ने अवधि साउन २१ देखि २७ सम्म

सेतोमसी
श्रावण १६, २०८२ शुक्रवार

रुपन्देही–३ उपनिर्वाचन : दल दर्ता गर्ने अवधि साउन २१ देखि २७ सम्म

अ +
अ
अ -

काठमाडौं । प्रतिनिधिसभा सदस्यको रिक्त पदपूर्तिका लागि रुपन्देही क्षेत्र नम्बर ३ मा मंसिर १७ गते हुने उपनिर्वाचनमा सहभागी हुन चाहने राजनीतिक दलहरूका लागि निर्वाचन आयोगले दल दर्ता प्रक्रिया खुला गरेको छ । आयोगले साउन २१ गतेदेखि २७ गतेसम्म कार्यालाय समयभित्र निवेदन दिन आह्वान गरेको हो ।

निर्वाचन आयोगका प्रवक्ता तथा सहसचिव नीता पोखरेल अर्यालद्वारा बिहीबार जारी विज्ञप्तिमा नेपाल संविधानको धारा २७१ र राजनीतिक दल सम्बन्धी ऐन, २०७३ को दफा ४८ बमोजिम कान्तिपथस्थित आयोगमा दल दर्ताको निवेदन दिन सकिने उल्लेख गरिएको छ ।

दल दर्ता निवेदन राजनीतिक दल सम्बन्धी नियमावली, २०७४ को अनुसूची–१२ अनुसार तयार गर्नुपर्नेछ । आयोगले निवेदन दिने बेलामा पेश गर्नुपर्ने विवरण र कागजातसमेत स्पष्ट पारेको छ । दलको पूरा विवरण, कार्यसमितिका पदाधिकारी संख्या, वार्षिक लेखापरीक्षण प्रतिवेदन, उम्मेदवारलाई मनोनयन दिने अधिकारसम्बन्धी निर्णयको प्रतिलिपि, पदाधिकारीको दस्तखत नमूना लगायतका विवरण समावेश गरिनुपर्नेछ ।

विगत आर्थिक वर्षहरूमा एकीकरण वा गाभिएका दलहरूले फरक किसिमको लेखा परीक्षण प्रतिवेदन पनि पेश गर्नुपर्नेछ । दलको प्रमुख पदाधिकारीले दस्तखत गरेका प्रमाणित चेकलिस्ट (रुजु सूची) अनिवार्य रूपमा संलग्न गर्नुपर्ने आयोगले स्पष्ट पारेको छ ।