बुटवल । ब्रम्हाकुमारी ईश्वरीय विश्वविद्यालयले विश्वव्यापी रुपमा सञ्चालन गरेको १०० घण्टामा एक लाख पिन्ट रगत संकलन गर्ने अभियान अन्तर्गत देवदहमा पनि रक्तदान कार्यक्रम सम्पन्न भएको छ । ६ गतेदेखि सुरु भएको यस अभियान अन्तरगत विश्वका १४० भन्दा बढी देशमा रक्तदानका कार्यक्रम सञ्चालन भइरहेको जनाइएको छ ।

विश्वविद्यालयकी पूर्व अन्तर्राष्ट्रिय मुख्य प्रशासिका राजयोगिनी दादी प्रकाशमणीको १८ औं स्मृति दिवस एवं विश्व बन्धुत्व दिवसको अवसरमा आइतवार देवदहमा आयोजित कार्यक्रममा ४३ पिन्ट रगत संकलन भएको आयोजकले जानकारी दिएको छ ।

देवदहस्थित ब्रम्हाकुमारी ईश्वरीय विश्वविद्यालय एवं राजयोग प्रशिक्षण केन्द्रमा आयोजित कार्यक्रममा बोल्दै देवदह नगर प्रमुख ध्रुवप्रसाद खरेलले ऐतिहासिक अभियानमा देवदह पनि जोडिनु गौरवको विषय भएको बताए । उनले देवदहलाई अध्यात्मिक स्थलका रुपमा परिचित गराउँदै रक्तदानजस्ता पवित्र कार्यमा सबैले सहभागी हुनु आवश्यक रहेको उल्लेख गरे ।

देवदह नगर प्रवक्ता तथा देवदह–५ का अध्यक्ष गणेश डुम्रेले मानसिक शान्ति अहिलेको पहिलो आवश्यकता भएको बताउँदै कर्मको महत्व र सकारात्मक सोचले नै जीवनलाई सन्तुलित बनाउन सक्ने धारणा राखे । उनले विश्वव्यापी तथ्यांक प्रस्तुत गर्दै आगामी २० वर्षमा प्रत्येक घरमा एक जना मानसिक रोगी हुने सम्भावना रहेको चेतावनी दिए । उनले भने, “मानसिक रोगीले खाने औषधिको प्रयोग हाल ४० प्रतिशतले वृद्धि भएको तथ्याङ्क देखाउँछ ।”

देवदह आदर्श बहुमुखी क्याम्पसका अध्यक्ष वासुदेव रिमालले रक्तदानलाई बन्धुत्व र मानवतावादको सबैभन्दा ठुलो भावनासँग जोड्दै निरन्तर रक्तदान अभियान चलाउन आग्रह गरे । नेपाली कांग्रेस देवदह नगर सभापति गुनाखर भुर्तेलले रक्तदान जस्तो जीवनरक्षक कार्यमा राजनीतिक भेदभावभन्दा माथि उठी सबैले सहभागी हुनुपर्नेमा जोड दिए ।

देवदह प्रेस क्लबका अध्यक्ष विष्णु पोखरेलले १०० घण्टामा एक लाख पिन्ट रगत संकलन गर्ने संकल्प मानवीय कार्य मात्र नभएर ऐतिहासिक अभियान समेत भएको उल्लेख गरे । 

ब्रम्हाकुमारी ईश्वरीय विश्वविद्यालय एवं राजयोग प्रशिक्षण केन्द्र देवदह प्रमुख कमला दिदीले दादी प्रकाशमणीको स्मृतिमा आयोजना गरिएको अभियानलाई देवदहबासीले दिएको साथप्रति आभार व्यक्त गरिन् । उनले रक्तदानलाई ‘विश्व बन्धुत्वको सबैभन्दा ठुलो प्रतीक’ भन्दै निरन्तर मानवीय सेवा कार्यमा लागिरहने प्रतिबद्धता जनाइन् ।

रक्तदान कार्यक्रममा रक्त सन्चार सेवा केन्द्र बुटवलले प्राविधिक सहयोग गरेको थियो ।