संसद

संघीय संसदका चार समितिको बैठक बस्दै

सेतोमसी
भाद्र २३, २०८२ सोमवार

अ +
अ
अ -

काठमाडौँ । आज संघीय संसदका चार समितिको बैठक बस्दैछ ।

आज दिनको साढे १२ बजे बस्ने प्रतिनिधि सभाको कृषि, सहकारी तथा प्राकृतिक स्रोत समितिको बैठकमा केरा व्यवसायी कृषकका समस्याका सम्बन्धमा अर्थ, कृषि तथा पशुपंक्षी विकास र उद्योग वाणिज्य तथा आपूर्ति मन्त्रालय र सरोकारवालासँग छलफल हुने कार्यसूची रहेको छ ।

त्यस्तै आज बिहान ११ बजेदेखि शुरु हुने प्रतिनिधि सभा अन्तर्गतको राज्य व्यवस्था तथा सुशासन समितिको बैठकमा नेपाल प्रहरी सम्बन्धी कानूनलाई संशोधन तथा एकीकरण गर्न बनेको विधेयकमाथि संशोधन प्रस्ताव दर्ता गराउने सांसदहरुसँग छलफलको कार्यसूची रहेको समितिले जानकारी दिएको छ ।

त्यसैगरी आज बिहान साढे ११ बजे बस्ने प्रतिनिधि सभा अन्तर्गतको शिक्षा, स्वास्थ्य तथा सूचना प्रविधि समितिको बैठकमा स्वास्थ्य सम्बन्धी समसामयिक विषयमा स्वास्थ्य तथा जनसंख्या मन्त्रालयसँग छलफल हुने कार्यसूची रहेको छ ।

त्यस्तै आज बिहान ९ बजेदेखि शुरु हुने राष्ट्रिय सभा विकास, आर्थिक मामिला तथा सुशासन समितिको बैठकमा राष्ट्रिय सदाचार नीति सम्बन्धी अध्ययन प्रतिवेदन मस्यौदा वारेमा छलफल हुने कार्यसूची रहेको छ ।