सेयर बजार

पाल्पा सिमेन्टको आइपिओमा आवेदन दिने आज अन्तिम दिन

सेतोमसी
फाल्गुण १५, २०८२ शुक्रवार

पाल्पा सिमेन्टको आइपिओमा आवेदन दिने आज अन्तिम दिन

अ +
अ
अ -

काठमाडौँ । पाल्पा सिमेन्टको आइपिओमा आवेदन दिने आज अन्तिम दिन रहेको छ । कम्पनीले फागुन १२ गतेदेखि सर्वसाधारणका लागि आईपीओ खुला गरेको थियो ।

शुक्रबार बिहानसम्म यस आइपिओमा २२ लाखभन्दा बढी लगानीकर्ताले आवेदन दिइसकेका छन् ।

यसअघि कम्पनीले उद्योग प्रभावित क्षेत्रका स्थानीय बासिन्दा र वैदेशिक रोजगारीमा रहेका नेपालीका लागि शेयर बाँडफाँड गरेको थियो। कुल जारी पूँजी ३ अर्ब ७५ करोड रुपैयाँमध्ये २० प्रतिशत अर्थात् ७५ करोड रुपैयाँ बराबरको ७५ लाख कित्ता शेयर निष्काशन गर्न अनुमति पाएको थियो । यसमध्ये १८ लाख ७५ हजार कित्ता स्थानीय बासिन्दा, ५ लाख ६२ हजार ५०० कित्ता विदेशमा रहेका नेपाली, २ लाख ८१ हजार २५० कित्ता सामूहिक लगानी कोषका लागि र २ लाख ८१ हजार २५० कित्ता कम्पनीका कर्मचारीका लागि बाँडफाँड गरिएको थियो ।

अब बाँकी रहेका ४५ करोड रुपैयाँ बराबरको ४५ लाख कित्ता शेयर सर्वसाधारण लगानीकर्ताका लागि निष्काशन गरिएको छ । आइपिओमा न्यूनतम १० कित्ताका लागि आवेदन दिन सकिनेछ भने अधिकतम १ लाख कित्ताका लागि आवेदन दिन पाइनेछ ।

इन्फोमेरिक्स क्रेडिट रेटिङ्ग नेपालले कम्पनीलाई आईआरएन डबल बी प्लस इस्यूअर रेटिङ्ग प्रदान गरेको छ, जसले कम्पनीको दायित्व बहन गर्ने क्षमतामा मध्यम जोखिम रहेको संकेत गर्दछ ।

आइपिओको बिक्री प्रबन्धक नबिल इन्भेष्टमेन्ट बैंकिङ्ग लिमिटेड रहेको छ । लगानीकर्ताले नेपाल धितोपत्र बोर्डबाट स्वीकृत सम्पूर्ण आस्बा सदस्य बैंक तथा वित्तीय संस्थाहरूको तोकिएका शाखा कार्यालय वा ‘मेरो शेयर’ अनलाइन प्रणाली मार्फत आवेदन दिन सक्नेछन्।