अकुत सम्पत्ति कमाएका लेखा अधिकृतविरुद्ध मुद्धा दायर

सेतोमसी
चैत्र २३, २०८२ सोमवार

अकुत सम्पत्ति कमाएका लेखा अधिकृतविरुद्ध मुद्धा दायर

अ +
अ
अ -

काठमाडौँ । अख्तियार दुरुपयोग अनुसन्धान आयोगले गण्डकी प्रदेश सरकार अन्तर्गत भौतिक पूर्वाधार विकास तथा यातायात व्यवस्था मन्त्रालय, पोखराका लेखा अधिकृत झलक शर्मा पौडेलविरुद्ध विशेष अदालतमा मुद्दा दायर गरेको छ ।

आयोगका अनुसार पौडेलले पदको दुरुपयोग गर्दै गैरकानुनी रूपमा ६ करोड २६ लाखभन्दा बढी सम्पत्ति आर्जन गरेको आरोप लागेको छ । उनले अवैध रूपमा कमाएको सम्पत्ति लुकाउन नक्कली ऋण सापटी देखाउने र विभिन्न कारोबारमार्फत स्रोत लुकाउने प्रयास गरेको अनुसन्धानबाट खुलेको जनाइएको छ ।

त्यसमध्ये करिब २ करोड ५१ लाख रुपैयाँ बैंक तथा सहकारीमा जम्मा गरिएको भेटिएको छ । साथै करिब २ करोड ५८ लाख रुपैयाँ बराबरको सम्पत्तिको स्रोत नभएको पुष्टि भएपछि सम्पत्ति शुद्धीकरणको मुद्दा पनि चलाइएको छ ।

आयोगले उक्त रकम जफत गर्न तथा कैद र जरिवाना सजाय माग गर्दै विशेष अदालतमा आरोपपत्र दायर गरेको जनाएको छ। साथै उनको खातामा रहेको करिब १ करोड ७० लाख रुपैयाँ जफत गर्न माग गरिएको छ।

यस प्रकरणमा पौडेलकी पत्नी हुमा कुमारी उपाध्याय सहित जमुना कुमारी रोका क्षेत्री, हरिप्रसाद पौडेल र शान्ति दराई पौडेललाई पनि सहयोगीको रूपमा प्रतिवादी बनाइएको छ। उनीहरूलाई मुख्य आरोपितलाई हुने सजायको आधा सजाय माग गरिएको आयोगले जनाएको छ।

आयोगका अनुसार भ्रष्टाचारबाट आर्जित सम्पत्ति लुकाउन सहयोग गरेको ठहर भएपछि उनीहरू विरुद्ध पनि मुद्दा दायर गरिएको हो ।