देवदह । देवदह खानेपानी तथा सरसफाई संस्थामा सर्वसम्मत नेतृत्व चयन गर्ने प्रयास असफल भएको छ । राजनीतिक दलहरू बीच सहमति कायम हुन नसकेपछि अन्तत: निर्वाचनबाटै नेतृत्व चयन हुने भएको हो । 

खानेपानी संस्थाको निर्वाचन भनिएपनि दलहरुले प्रत्यक्ष हस्तक्षेप गर्दा सहमति हुन नसकेको एक उपभोक्ताले सेतोमसीलाई बताए । ‘राजनीतिक विचार विनाको मान्छे हुन्न तर सबै ठाउँमा दल र पार्टी सदस्यता बोकेर हिड्ने संस्कार सहि होइन ।’ उनले भने, ‘यसमा देवदहमा क्रियाशील दलहरु चुके ।’

सेतोमसीलाई प्राप्त पछिल्लो जानकारी अनुसार खानेपानीको अध्यक्षमा उमेदवारी दिएका आठ जना उम्मेदवार मध्ये ६ जनाले उम्मेद्वारी फिर्ता लिएका छन् । जसमा हालका अध्यक्ष गुमानसिंग कुँवर, उपाध्यक्ष अनिशा लामिछाने र कोषाध्यक्ष कृष्णप्रसाद ज्ञवालीसंगै सल्लाहकार मोतिलाल ढकाल र सदस्य उपेन्द्र पाण्डेय रहेका छन् ।

निर्वाचनमा दुई प्यानल विच प्रतिष्पर्धा हुने प्रष्ट देखिएको छ । जसमा राष्ट्रिय स्वतन्त्र पार्टीको तर्फबाट राजन अधिकारीको एकल प्यानल हुनेछ भने अन्य दलहरु नेपाली कांग्रेस, नेकपा एमाले, नेपाली कम्युनिष्ट पार्टी र राष्ट्रिय प्रजातन्त्र पार्टीको संयुक्त प्यानलको नेतृत्व दामोदर क्षेत्रीले गर्नेछन् । 

राजन अधिकारीको प्यानलबाट उपाध्यक्षमा तुलसी खनाल, सचिवमा दुर्गा प्रसाद तिवारी, सहसचिवमा भगवती न्यौपाने ढकाल, कोषाध्यक्षमा भिमलाल काफ्ले र लेखा समिति संयोजकमा बिमल भुसाल रहेका छन् । 

त्यसैगरी दामोदर क्षेत्री नेतृत्वको प्यानलबाट उपाध्यक्षमा रेनुका पाण्डे, सचिवमा बाबुराम न्यौपाने, सहसचिवमा सम्झना मल्ल, कोषाध्यक्षमा यमलाल तिवारी र लेखा संयोजकमा कृष्ण प्रसाद न्यौपाने रहेका छन् ।

अध्यक्षमा प्रतिष्पर्धा गर्न लागेका दुवै उम्मेदवार देवदह वडा नं ६ का हुन् । रास्वपा निकट अधिकारी पूर्व बैंक कर्मचारी हुन् भने नेपाली कांग्रेस निकट क्षेत्री पुर्व वडा अध्यक्ष हुन् । 

खानेपानीका निर्वाचन समिति संयोजक अधिवक्ता डासीराम पाण्डेयले आफुहरु उम्मेदवारको अन्तिम नामावाली प्रकाशनको तयारीमा जुटेको र केही समयमा प्रकाशन गर्ने बताए ।