काठमाडौँ । कृत्रिम बुद्धिमत्ता (एआई) अब केवल संवाद गर्ने प्रणाली वा सामग्री निर्माण गर्ने प्रविधिमा मात्र सीमित छैन । यसले विश्वव्यापी विज्ञापन उद्योगको कार्यशैलीलाई पनि तीव्र रूपमा परिवर्तन गरिरहेको छ ।

परामर्शदाता संस्था रेडसिरले सार्वजनिक गरेको एक प्रतिवेदनअनुसार कृत्रिम बुद्धिमत्ताले विज्ञापन क्षेत्रलाई अझ बुद्धिमानी, तथ्यांकमा आधारित तथा परिणाममुखी बनाइरहेको छ। यही परिवर्तनका बीच भारत विश्वका प्रमुख विज्ञापन प्रविधि कम्पनीहरूको केन्द्र बन्ने बलियो स्थितिमा पुगेको प्रतिवेदनमा उल्लेख गरिएको छ।

प्रतिवेदनका अनुसार विश्वव्यापी विज्ञापन बजारको आकार हाल एक खर्ब अमेरिकी डलर नाघिसकेको छ । यस्तो अवस्थामा कृत्रिम बुद्धिमत्ताले उद्योगका लगभग सबै क्षेत्रमा प्रभाव पारिरहेको छ । सञ्चारमाध्यम खरिद, सिर्जनात्मक सामग्री निर्माण, कार्यसम्पादन मूल्याङ्कन, विद्युतीय व्यापार तथा ग्राहक लक्षित विज्ञापनजस्ता प्रक्रिया तीव्र रूपमा कृत्रिम बुद्धिमत्तामा आधारित बन्दै गएका छन् ।

प्रतिवेदनअनुसार हाल डिजिटल विज्ञापनले विश्वव्यापी विज्ञापन खर्चको ७५ देखि ८० प्रतिशत हिस्सा ओगटीसकेको छ । तीमध्ये ८० देखि ८५ प्रतिशत विज्ञापन स्वचालित प्रविधिमार्फत सञ्चालन भइरहेका छन् ।

प्रतिवेदनमा छिमेकी देश भारतमा प्रत्येक वर्ष करिब २७ लाख इन्जिनियरिङ तथा प्रविधि विषयका विद्यार्थी भर्ना हुन्छन् । त्यसबाहेक देशमा करिब दुई करोड ४० लाख सफ्टवेयर विकासकर्ता सक्रिय छन् । भारतमा हाल करिब एक हजार नौ सय विश्वव्यापी क्षमता केन्द्र सञ्चालनमा छन्, जसले वार्षिक ६५ अर्बदेखि ७५ अर्ब अमेरिकी डलरसम्म निर्यात आम्दानी सिर्जना गरिरहेका छन् । प्रतिवेदनले भारतको विशाल प्रविधि संरचनाले कृत्रिम बुद्धिमत्तामा आधारित उत्पादन तथा मञ्चहरूको विकासका लागि बलियो आधार प्रदान गरिरहेको जनाएको छ । यही कारणले भारत विश्वव्यापी विज्ञापन प्रविधि नवप्रवर्तनको अर्को ठूलो केन्द्र बन्न सक्ने अनुमान गरिएको छ । रेडसिरको अनुमानअनुसार भारतको डिजिटल विज्ञापन बजार सन् २०२५ मा करिब २१ अर्ब अमेरिकी डलरको थियो । यो बजार सन् २०३० सम्म बढेर ३३ अर्बदेखि ४२ अर्ब अमेरिकी डलरबीच पुग्न सक्ने प्रक्षेपण गरिएको छ ।

यस वृद्धिले कृत्रिम बुद्धिमत्तामा आधारित विज्ञापन प्रविधि तथा नवप्रवर्तनमुखी कम्पनीहरूलाई ठूलो प्रोत्साहन मिल्ने अपेक्षा गरिएको छ ।

रेडसिरले प्रतिवेदनमा कृत्रिम बुद्धिमत्ताले विज्ञापन उद्योगमा केवल नयाँ प्रविधि थप्ने काम मात्र गरिरहेको छैन, यसले सम्पूर्ण प्रणालीलाई नयाँ ढङ्गले परिभाषित गरिरहेको बताएको छ । मेसिन लर्निङमा आधारित बोलकबोल प्रणाली, पहिचान संरचना, ट्रान्सफर्मरमा आधारित सिफारिस प्रणाली तथा स्वचालित विज्ञापन संरचनाले विज्ञान बजारमा रहेको परम्परागत संरचनालाई विस्थापित गरिसकेका छन् ।

प्रतिवेदनका अनुसार विश्वव्यापी रुपमा प्रविधि कम्पनीहरू अब केवल प्राविधिक सेवा प्रदान गर्ने भूमिकामा सीमित छैनन् । उनीहरू विश्वव्यापी उत्पादन कम्पनीका रूपमा उदाइरहेका छन् र सफ्टवेयर तथा मञ्चमा आधारित बढी लाभदायी व्यावसायिक मोडल अपनाइरहेका छन् । कृत्रिम बुद्धिमत्ताको प्रयोग बढ्दै जाँदा बलियो तथ्यांक संरचना, उन्नत सञ्जाल प्रणाली तथा आधुनिक कृत्रिम बुद्धिमत्ता क्षमतायुक्त खुला प्रविधि वातावरण भविष्यको विश्वव्यापी प्रतिस्पर्धाको मुख्य आधार बन्ने प्रतिवेदनले जनाएको छ ।