पहिरोका कारण तीन जिल्लाका प्रमुख राजमार्ग अवरुद्ध

सेतोमसी
श्रावण २५, २०८३ सोमवार

पहिरोका कारण तीन जिल्लाका प्रमुख राजमार्ग अवरुद्ध

अ +
अ
अ -

काठमाडौँ । लगातारको वर्षाका कारण पहिरो खस्दा लमजुङ, काभ्रे र सिन्धुपाल्चोकका प्रमुख राजमार्ग पूर्ण रूपमा अवरुद्ध भएका छन्।

लमजुङको मध्यनेपाल नगरपालिका–१० बिमिरेभञ्ज्याङस्थित मध्यपहाडी लोकमार्गमा आइतबार राति करिब ८: १० बजे माथिबाट पहिरो खसेपछि सडक पूर्ण रूपमा अवरुद्ध भएको हो। उक्त स्थानमा वैकल्पिक सडक भने रहेको जनाइएको छ ।

त्यस्तै, काभ्रेको रोशी गाउँपालिका–९ पिन्थली, नार्के क्षेत्रमा सोमबार बिहान करिब ४ बजे वर्षाका कारण माथिबाट लेदोसहितको पहिरो खसेपछि बिपी राजमार्ग पूर्ण रूपमा अवरुद्ध भएको छ ।

त्यस्तै सिन्धुपाल्चोकको चौतारा साँगाचोकगढी नगरपालिका–९ डुम्रेमा पनि सोमबार बिहान करिब ५ बजे अरनिको राजमार्गमा माथिबाट लेदोसहितको पहिरो खसेपछि सडक पूर्ण रूपमा अवरुद्ध भएको छ ।

लगातारको वर्षाका कारण पहाडी तथा हिमाली जिल्लाका सडकमा पहिरो र लेदो खस्ने क्रम बढेकाले यात्रु तथा सवारी चालकलाई सडकको अवस्था बुझेर मात्र यात्रा गर्न आग्रह गरिएको छ ।