काठमाडौँ । कोलम्बियाको पश्चिमी क्षेत्रमा गएको शक्तिशाली भूकम्पमा परी मृत्यु हुनेको संख्या कम्तीमा २५४ पुगेको छ । उद्धारकर्मीहरूले भग्नावशेषमा फसेका मानिसको खोजीलाई तीव्र बनाएका छन् ।

७.४ म्याग्निच्युडको भूकम्प सोमबार बिहान गएको थियो । यसलाई यस शताब्दीमा कोलम्बियामा गएको सबैभन्दा विनाशकारी भूकम्पका रूपमा लिइएको छ । भूकम्पका कारण देशको कफी उत्पादन हुने मुख्य क्षेत्रमा रहेका आवासीय भवन, घर, विद्यालय तथा स्वास्थ्य केन्द्रमा ठूलो क्षति पुगेको छ। कतिपय भवन चर्किएका छन् भने केही ढलेका छन् ।

प्रभावित विभिन्न सहरबाट प्राप्त विवरणअनुसार अहिलेसम्म मृत्यु हुनेको संख्या २५४ पुगेको छ । कफी उत्पादनको प्रमुख क्षेत्र पेरेरामा मात्रै १०१ जनाको मृत्यु भएको छ भने देशको तेस्रो ठूलो सहर कालीमा ९५ जनाको ज्यान गएको छ।

भूकम्पको केन्द्रबिन्दु नजिकै पर्ने प्रशान्त महासागर किनारको चोको क्षेत्रमा रहेका धेरै आदिवासी बस्ती अझै विद्युत् तथा आधारभूत सेवाबाट वञ्चित छन् । यसले उद्धार तथा राहत कार्यमा थप कठिनाइ उत्पन्न भएको छ ।

उद्धारकर्मीहरूले भग्नावशेषमा जीवित मानिस फसेका हुन सक्ने आशंकामा खोजी गर्दा केही समय पूर्ण शान्त रहन आग्रह गर्दै आवाज सुन्ने प्रयाससमेत गरिरहेका छन् । सोमबार रातिदेखि मंगलबारसम्म उनीहरूले ठूला यन्त्र, उत्खनन उपकरण र आफ्नै हातको प्रयोग गरेर भग्नावशेष हटाइरहेका छन्। उद्धारकर्मीहरूले मानव शृंखला बनाएर बाल्टिनमा भग्नावशेष निकाल्दै खोजी अभियान अघि बढाएका छन् ।

भूकम्प गएलगत्तै नवनिर्वाचित राष्ट्रपति अबेलार्दो दे ला एस्प्रिएल्लाले प्रभावित क्षेत्रको भ्रमण गरेका छन् । उनले घर गुमाएका नागरिकलाई आर्थिक सहयोग उपलब्ध गराउने प्रतिबद्धता व्यक्त गरेका छन् ।

सरकारले सत्ता सम्हालेपछि तत्काल मितव्ययिता उपाय घोषणा गरेको थियो। अहिले यसअघिको वामपन्थी सरकारले तयार पारेको १८० अर्ब अमेरिकी डलरभन्दा बढीको बजेट पुनरावलोकन गर्ने तयारी भइरहेको छ ।

कोलम्बिया विभिन्न ठूला भूगर्भीय प्लेटको संगम क्षेत्रमा अवस्थित भएकाले विश्वकै बढी भूकम्पीय जोखिम भएका मुलुकमध्ये पर्छ । यद्यपि, यहाँ आउने धेरै भूकम्प जमिनको निकै गहिराइमा उत्पन्न हुने भएकाले सतहमा आइपुग्दा त्यसको प्रभाव तुलनात्मक रूपमा कम हुने गरेको छ । पछिल्लो एक सय वर्षमा कोलम्बियामा ७ म्याग्निच्युडभन्दा माथिका भूकम्प निकै कम गएका छन् ।