हिजबुल्लाहका वरिष्ठ कमान्डर मारिएको इजरायलको दाबी

सेतोमसी
श्रावण ३१, २०८३ आइतवार

हिजबुल्लाहका वरिष्ठ कमान्डर मारिएको इजरायलको दाबी

अ +
अ
अ -

काठमाडौँ । इजरायली सेनाले हिजबुल्लाहको ‘बद्र इकाइ’का वरिष्ठ कमान्डर अबु हसन अलालाई मारिएको दाबी गरेको छ ।

इजरायली सेनाले सामाजिक सञ्जालमार्फत हिजबुल्लाहले इजरायली सैनिकविरुद्ध गर्दै आएका गतिविधिको जवाफमा कारबाही गरिएको जनाएको छ ।

सेनाका अनुसार हसन अला इजरायली सैनिकविरुद्धका विभिन्न आक्रमणको योजना बनाउने र कार्यान्वयनमा संलग्न थिए । उनले दक्षिणी लेबनानमा इजरायली सैनिकतर्फ विस्फोटक पदार्थ बोकेका मानवरहित विमान पठाउने गतिविधिमा समेत भूमिका खेलेको सेनाको दाबी छ ।

यसैबीच, अरब लिगले लेबनानमाथि भएका इजरायली आक्रमणको निन्दा गरेको छ । अरब लिगका अनुसार पछिल्लो दिन भएका आक्रमणमा ११ जनाको मृत्यु भएको छ । घटनापछि क्षेत्रमा तनाव खतरनाक रूपमा बढ्दै गएको लिगले जनाएको छ ।

अरब लिगले यस्ता आक्रमणले द्वन्द्व अन्त्य गर्ने तथा समाधान खोज्ने प्रयासमा असर पार्न सक्ने चेतावनी दिएको छ । अरब लिगका प्रवक्ताले इजरायलका नीति र गतिविधिले कब्जाको नीति अपनाउने पक्ष द्वन्द्वलाई लामो समयसम्म जारी राख्न, वार्तामा अवरोध पुर्‍याउन र भूमिमा नयाँ अवस्था थोपर्न चाहेको देखिएको आरोप लगाए । यस्ता प्रयास पूर्ण रूपमा अस्वीकार्य र निन्दनीय रहेको अरब लिगले जनाएको छ ।