पुर्ण पौडेल, देवदह । देवदह नगरपालिकाले कर्मचारीको प्रोत्साहन भत्तामा कटौती गरेको छ । शुक्रबार बसेको नगर कार्यपालिका १३१ औं बैठकले यसअघि कर्मचारीलाई दिंदै आएको प्रोत्साहन भत्तामा लगभग ५० प्रतिशत कटौती गरेको हो । 

यस अघि ४० प्रतिशतसम्म प्रोत्साहन भत्ता लिदै आएका नगरपालिकाका कर्मचारीलाई अब मुल्यांकनका आधारमा २० देखि २५ प्रतिशत मात्रै प्रोत्साहन भत्ता दिने निर्णय भएको नगर प्रवक्ता गणेश डुम्रेले बताए । स्थानीय तहमा जनप्रतिनिधि निर्वाचित हुनुअघि जनप्रतिनिधिको काम समेत कर्मचारीले गर्नुपरेको तत्कालीन अवस्थामा कर्मचारीलाई कामका आधारमा प्रोत्साहन भत्ताको व्यवस्था गरिएको भएपनि त्यसपश्चात जनप्रतिनिधिले कडाई गर्न नसक्दा कर्मचारीले सो भत्ता लिंदै आएका थिए ।

कार्यपालिका बैठकले देवदह ९ को कालिकाटोलमा लालपुर्जा वितरणको सम्पुर्ण प्रक्रिया पूरा भएकोले राजश्व संकलन भएका अव्यवस्थित बसोबासीलाई जग्गाधनी पुर्जा वितरणका लागि राष्ट्रिय भुमी आयोग रुपन्देहीलाई सिफारिस गर्ने निर्णय गरेको पत्रकार भेटघाटमा प्रवक्ता डुम्रेले बताएका छन् ।

त्यसैगरी देवदह नगरपालिकाको नगर गीत र लोगो निर्माणका लागि नगरप्रवक्ता गणेश डुम्रेको संयोजकत्वमा समिति गठन गरिएको बताईएको छ । जसको सह-संयोजकमा दीपक नेपाल र सदस्यहरूमा लक्ष्मी विक, निर्मल ढुंगाना, हिरामणी शर्मा, सुशील सापकोटा र यज्ञ न्यौपाने रहेका छन् । उक्त समितिले ६० दिनभित्र आफ्नो काम सम्पन्न गर्नेछ ।

साथै नगरपालिकाले बजार अनुगमनको लागि वडा नं. ७ का अध्यक्ष कृष्ण प्रसाद अधिकारीको संयोजकत्वमा  बजार अनुगमन समिती गठन र देवदह क्षेत्रमा रहेका अटो रिक्सा संचालन तथा व्यवस्थापनका लागि समेत समिति गठन गरेको छ । जसको संयोजकमा दमननाथ रेग्मी र सदस्यहरूमा गीता भण्डारी, कुमार दमाई र केशव राज राना रहेको नगरपालिकाले जनाएको छ ।