कविता

कविता : बजेट होस त यस्तो

रामचन्द्र तिम्सिना
जेठ १६, २०७८ आइतवार

अ +
अ
अ -

बजेट होस त यस्तो

उपचार नपाएर कोहि मर्न नपरोस
शिक्षा नपाएर कोहि ठगिनु नपरोस
शिक्षा र स्वास्थ्य ब्यापार नबनोस
देशमा बजेट होस त यस्तो
शिक्षा र स्वास्थ्य नि:शुल्क होस।

किसानीलाई अनुदान होईन
सिधै राहत बाढियोस
घरघरमा पुगेर
कसैलाई कोदालो कसैलाई हँसिया दिइयोस
हलिहरुको हात-हातमा
रामो, बसिला, करुवा र फाली थमाइयोस।

नहोस कहिल्यै सिजनमा मलको हाहाकार
नहोस कुनै बजारमा बिउको अभाव
उत्पादित वस्तु सरकारले किनिदियोस
मूल्य नपाएर कसैले आत्महत्या गर्न नपरोस
देशको बजेट यस्तो होस
किसानको खेतखेतमा मल र बीउ बाढियोस।

सुनिन्छ शिक्षामा लगानी प्रसस्तै बढेको छ अरे
शिक्षाको गुणस्तर माथी उठ्दैछ अरे
ब्याचलर पढेको युवा खाडी पुग्दा
लेबरमा खट्नु नपरोस
देशको बजेट यस्तो होस
प्रमाणपत्र भन्दा प्राविधिक शिक्षा बाढियोस।

पढाईन्छ बोर्डिङ सुकलहरुमा अंग्रेजि
अनि घोकाईन्छ "ए" फर एप्पल चल्छ
थाहा छैन बिचरोलाई
"राइस" माने "धान" कहाँ फल्छ।
देशको बजेट यस्तो होस
शैक्षिक योग्यताको प्रमाणपत्र भन्दा ब्यबहारिकताको प्रमाणपत्र बाढियोस।

दिईन्छ सिमित ब्यक्तिलाई बेरोजगार भत्ता
लगाईन्छ केही ब्यक्तिलाई स्वरोजगार कार्यक्रममा
अनि बजाईन्छ खल्ती मिडियाबाट
गरिबी हटाईदैछ देशमा
मत भन्छु देशको बजेट यस्तो होस
कसैको हात खाली नबसोस।
कोहि भोको सुत्न नपरोस।

✍️ रामचन्द्र तिम्सिना (आवाज)