ग्लोबल आइएमई बैंक र बैंक अफ काठमान्डुको एकीकृत कारोबार सोमबार सुरु

सेतोमसी
पौष २५, २०७९ सोमवार

ग्लोबल आइएमई बैंक र बैंक अफ काठमान्डुको एकीकृत कारोबार सोमबार सुरु

अ +
अ
अ -

काठमाडौँ। ग्लोबल आइएमई बैंक र बैंक अफ काठमाडौ एकीकृत कारोबार सोमबार सुरु भएको छ । प्रधानमन्त्री पुष्पकमल दाहाल ‘प्रचण्ड’ले दुवै बैंकको एकीकृत कारोबारको सोमबार शुभारम्भ गरेका हुन् ।

दुवै बैंकको सम्पूर्ण सम्पत्ति तथा दायित्व गाभिएपछि बन्ने संस्थामा सर्ने गरी दुवै संस्थाबाट सञ्चालन हुँदै आएका सम्पूर्ण वित्तीय कारोबार सोमबारदेखि ‘ग्लोबल आइएमई बैंक लिमिटेड’का नामबाट सुरु भएका छन । यी दुुई ठुला–ठुला बैंक मर्ज भएपछि ग्लोबल आइएमई बैंक मुलुककै ठूलो बैंक बनेको छ ।

मर्जरपश्चात् बैंकको कुल पुँजी ५७ अर्ब रुपैयाँ, चुक्ता पुँजी ३५.७७ अर्ब रुपैयाँ, कुल निक्षेप ४ खर्ब, कुल कर्जा ३ खर्ब ७९ अर्ब रुपैयाँभन्दा बढी भएको बैंकले जनाएको छ ।

नयाँ बैंकको सञ्चालक समितिमा ग्लोबल आईएमई बैकको तर्फबाट अध्यक्ष चन्द्रप्रसाद ढकाल सहित ५ जना र बैंक अफ काठमाण्डूको तर्फबाट २ जना रहनेछन् । त्यसैगरी बैंकको प्रमुख कार्यकारी अधिकृतको रुपमा ग्लोबल आईएमई बैंकका प्रमुख कार्यकारी अधिकृत रत्नराज बज्राचार्य रहनेछन् ।

दुई बैंकहरुको मर्जर पश्चात् कूल ३६५ शाखा कार्यालय, ३६७ एटिएम, २८६ शाखा रहित बैंकिङ्ग सेवा, ६१ विस्तारित शाखा कार्यालयहरू, ३ वटा विदेश स्थित सम्पर्क कार्यालयहरू, ४० लाख भन्दा बढी ग्राहकहरू रहनेछन् ।