चोरको नजर मन्दिरमा: देवदहको कोटियामाई मन्दिरमा पनि दानपेटिका फोडेर ५० हजार बढी चोरी

सेतोमसी
चैत्र २, २०७९ बिहिवार

चोरको नजर मन्दिरमा: देवदहको कोटियामाई मन्दिरमा पनि दानपेटिका फोडेर ५० हजार बढी चोरी

अ +
अ
अ -

देवदह । देवदहको कोटियामाई मन्दिरमा पनि गतराती चोरी भएको छ। शितलनगरको दुर्गा पंचायतन मन्दिरमा चोरी भएकै रात घोडाहाको कोटहीमाई मन्दिरमा पनि चोरी भएको हो।

मन्दिरमा राखिएको दानपेटिका फोडेर ५० हजार जति नगद चोरी भएको मन्दिर व्यवस्थापन समिति अध्यक्ष नित्यानन्द खनालले जानकारी दिए। उनले भने, "शितलनगरको दुर्गा पंचायतन मन्दिरमा दानपेटिका फोडेर चोरी भएको रैछ। त्यस्तै घटना हाम्रोमा पनि भयो। अनुमानित ५० हजार चोरी भएको छ। चोरको गिरोह नै सक्रिय भएजस्तो लग्यो।"

केहि महिना अघिमात्र महायज्ञ लगायर १ करोड बढी रकम संकलन गरेको मन्दिरमा चैते दशैँमा खोल्ने योजना सहित राखिएका दानपेटिकाबाट रकम चोरी भएको हो।

घटनाबारे बुझ्दा देवदह प्रहरी चौकीका प्रमुख डाक्टर प्रसाद चौधरीले घटनाबारेमा प्रहरीले अनुसन्धान गरिरहेको बताए।

देवदहमा चोरीका घटनामा वृद्धि भैरहेको उल्लेख गर्दै स्थानिय व्यवसायी पवन पौडेलले केहिदिन अघिदेखि घरघरबाट कलश जस्ता साना-साना बस्तु हराउंदै आएकोमा अहिले मन्दिरनै लुटिने अवस्था आउनु दु:खद रहेकोले स्थानिय प्रशासन र आमनागरिक समेत थप सजग हुनुपर्ने बताए।

स्मरण रहोस गतराति नै देवदहकै अर्को दुर्गा पंचायतन मन्दिरमा समेत दुईवटा दान पेटिका फोडेर १५ हजारबढी रकम चोरी भएको थियो।