धर्मराज थापा लोकगीत प्रतियोगितामा तनहुँका पदम नेपाली प्रथम

सेतोमसी सहकर्मी

धर्मराज थापा लोकगीत प्रतियोगितामा तनहुँका पदम नेपाली प्रथम

अ +
अ
अ -

राजेश पराजुली, पोखरा । पोखरा जनकविकेशरी धर्मराज-सावित्री थापा प्रतिष्ठानद्वारा आयोजित ‘धर्मराज थापा लोकगीत प्रतियोगिता’ मा तनहुँका पदम नेपाली प्रथम भएका छन् ।

प्रतियोगितामा ५७ टिमले सहभागिता जनाएका थिए । जसमा रुकुम पूर्वका समीर पुन दोस्रो र कास्कीका सम्राट गायक तेस्रो भए । नवलपुरकी देवी महतो र तनहुँका सन्तराज विकले सान्त्वना पुरस्कार प्राप्त गरे ।

उत्कृष्ट १० मा पर्न सफल पाल्पाका रविन नेपाली र सीमा सारु, सुर्खेतका खगेन्द्र परियार, गोरखाका निश्चल गुरुङ र स्याङ्जाका दिलीप मानन्धरलाई नगदसहित सम्मान गरियो ।

गण्डकी प्रज्ञा प्रतिष्ठानका कुलपति सूर्य खड्का बिखर्चीले देशविदेशमा पैताला खियाएर नेपाली लोकसंस्कृतिको प्रचार गर्दै हिंड्ने जनकविकेशरी धर्मराज थापा अजर प्रतिभा भएको बताए ।

प्राज्ञ हरिदेवी कोइरालाले धर्मराज थापा नेपाली लोकसंस्कृतिको धरोहर भएको उल्लेख गरिन् ।

पोखरा प्रज्ञा प्रतिष्ठानका कुलपति पद्मराज ढकालले ‘नेपालीले माया मार्‍यो बरिलै’ जस्ता मर्मस्पर्शी गीत गाउने जनकविकेशरीको आगामी वर्ष शतवार्षिकी भव्यरुपमा मनाउनुपर्नेमा जोड दिए ।

गायक चोलेन्द्र पौडेलको संयोजकत्वमा गठित निर्णायक समितिमा राष्ट्रिय लोक तथा दोहोरीगीत प्रतिष्ठान गण्डकी अध्यक्ष राजन कार्की, गण्डकी प्रज्ञा प्रतिष्ठानका प्राज्ञ दिलीप गायक सदस्य थिए ।

प्रतिष्ठान अध्यक्ष मदनराज थापाको अध्यक्षतामा भएको कार्यक्रममा सचिव कुञ्जराज थापाले स्वागत र सञ्चारकर्मी कृष्ण सुवेदीले संचालन गरेका थिए ।