काठमाडौं । नेपाल कृषि सहकारी केन्द्रीय संघले संयुक्त राष्ट्र संघीय खाद्य तथा कृषि संगठन (एफएओ) अवार्ड २०२३ प्राप्त गर्न सफल भएको छ।

एफएओ युएनले महासंघका सदस्य संघलाई विश्वभरका आफ्ना साझेदार संस्थाहरुमध्ये सर्वोत्कृष्ट साझेदार संस्थाका रुपमा अवार्ड प्रदान गरेको संघका अध्यक्ष खेम पाठकले जानकारी दिए । एफएओले संघलाई सहकारी सुशासन कायम गरेको, संस्थागत विकास गर्नका लागि क्षमता अभिबृद्धि गरेको, साना किसानाका जटिल कृषि तथा आर्थिक समस्याहरुलाई नीति निर्मातासम्म पु¥याउन सक्षम भएको, नेपालमा भोकमरी र कुपोषण अन्त्यका लागि वकालत गर्न सक्षम भएको भन्दै पुरस्कृत गरेको हो ।

११ बैशाखमा एफएओको हेडक्वार्टर इटलीको रोममा सो अवार्ड प्रदान गरिएको थियो । अवार्ड लिन संघका अध्यक्ष पाठक रोम पुगेका थिए । साना किसान विकास लघुवित्त वित्तीय संस्था र नेपाल कृषि सहकारी केन्द्रीय संघले विहीबार संयुक्त पत्रकार सम्मेलन आयोजना गरेर अवार्ड प्राप्त गरेको जानकारी गराएको हो ।

त्यसैगरी पत्रकार सम्मेलनमा साना किसान विकास लघुवित्त वित्तीय संस्थालाई नेपाल सरकार र एशियाली विकास बैंकको अनुदानमा सञ्चालन भएको प्रोजेक्टमा उत्कृष्ट कार्य गरेकोमा वेष्ट प्रोजेक्ट म्यानेजमेन्ट अवार्ड प्रदान गरेको समेत जानकारी गराइएको थियो ।

ग्रामीण उद्यम वित्तिय परियोजनाका लागि ५ अर्ब ६५ करोड रुपैयाँ सहुलियतपूर्ण ऋण प्रवाह गरी व्यवसायीक कृषि विकासमा उत्कृष्ट कार्य गरेको भन्दै सो अवार्ड दिएको संस्थाका सिइओ डा. शिवराम प्रसाद कोइरालाले बताए ।

नेपाल कृषि सहकारी केन्द्रीय संघमा ७७ जिल्लाका १२ सय सहकारी संस्था आवद्ध छन् । देशभर १२ लाखभन्दा बढी घर परिवार साना किसान सहकारी संस्थामा आवद्ध भएको समेत संघले जनाएको छ। जसमध्ये ८२ प्रतिशत महिला सदस्य आवद्ध भएको संघले जनाएको छ।