बझाङको थलारामा वडामै योजना सम्झौता

सेतोमसी
माघ १४, २०८० आइतवार

अ +
अ
अ -

रमेश बहादुर सिंह, बझाङ । बझाङको थलारा गाउँपालिकाले वडामै योजना सम्झौताको काम सुरू गरेको छ । वडा र पालिकाबाट बिनियोजन रकमको योजना सम्झौता गर्न उपभोक्ता समितिले सास्ती खेप्नु परेपछि पालिकाले वडामै योजना सम्झौता सुरु गरेको हो ।

वडाबाट सम्झौता गर्न पालिकामा जाँदा सबै कागजपत्र नपुग्ने र नगद समेत खर्च हुने गरेकोले गाउँवासीको सहजताको लागि गाउँपालिकाको टिम नै प्रत्येक वडा कार्यालयमा पुगेर सम्झौता गर्न सुरु गरिएको पालिकाले जनाएको छ ।

पालिकाबाट बिनियोजन गरेको सबै योजनाको सम्झौता वडा कार्यालयबाट भएपछि स्थानिय खुसी भएको वडा नम्बर ९ का वडा अध्यक्ष लोकेन्द्र बहादुर बिष्टले बताए ।

वडामै सम्झौता गर्दा उपभोक्ताहरुको समयको बचत हुनुका साथै नागरिकले सिहँदरबारको अधिकार गाउँघरमा पुगेको अनुभुती समेत गर्न पाउने भएकोले वडामै योजना सम्झौता सुरू गरिएको प्रमुख प्रशासकिय अधिकृत सिद्धराज पण्डितले बताए । वडा नम्बर १ देखि ९ सम्म नै पालिकाको टिम पुगेर सम्झौता गर्ने उनको भनाई छ ।