काठमाडौँ । त्रिदेशीय शृंखलाअन्तर्गत अन्तिम खेलमा नेपाललाई नेदरल्यान्ड्सविरुद्ध एक सय २१ रनको लक्ष्य दिएको छ ।
कीर्तिपुरस्थित त्रिवि मैदानमा टस जितेर ब्याटिङ गरेको नेदरल्यान्ड्स १९।३ ओभरमा अल आउट हुँदै एक सय २० रन बनाएको हो ।
खचाखच दर्शकले भरिएको कीर्तिपुर मैदानमा नेपालका बलर हाबी भएका थिए । धातक बलिङपछि नेदरल्यान्ड्सका कुनै पनि ब्याटरले ठूलो स्कोर बनाउन सकेनन् ।
युवा बलर प्रतिश जिसीले सर्वाधिक तीन विकेट लिए । बायाँ हाते बलर प्रतिशले चार ओभरमा एक मेडनसहित जम्मा १३ रन खर्चिएका थिए । कुशल मल्लले चार ओभरमा १८ रन सहित दुई विकेट लिए । करण केसीले तीन ओभरमा १८ रनसहित दुई विकेट हात पारे । दीपेन्द्रसिंह ऐरीले एक विकेट लिएका हुन् ।
नेदरल्यान्ड्सका म्याक्स ओ डावडले २४ बलमा चार चौका र एक छक्कासहित सर्वाधिक ३१ रन बनाए । टिम भान डेर गुस्टेनले २४, तथा कप्तान स्कट एडवार्डले १८ रनको योगदान गरे ।
रोइलोफ भान डे मेर्वीले १४ बलमा २३ रन बनाएर अविजित रहे । यसअघि कुशल मल्लले आर्यत दत्तलाई गोल्डेन डक आउट गरे । केली कलेइन पनि गोल्डेन डक भए । गुल्शन झाले उनलाई रनआउट गरेका हुन् ।
पहिलो ओभरमै करण केसीले दुई विकेट लिएपछि नेदरल्यानड्स दवावमा आएको थियो । करणले चार बल खेलेका ओपनर मिचेल लेभिटलाई चार रन तथा दुई बल खेलेका सेब्रान्ड इन्गेलब्रेचलाई शुन्यमा पेभिलयन फर्काएका हुन् ।
कप्तान रोहितकुमार पौडेलले टस हारेपछि नेपालले सुरुमा फिल्डिङ गरेको थियो । ओपनर अनिलकुमार शाहको स्थान कुशल भुर्तेलले पुनरागमन गरेका छन् ।
फाइनल प्रवेश सम्भावना कायम राख्न नेपाललाई आज जित्नैपर्ने दबाब छ । आजको हारले नेपालको सम्भावना सकिनेछ । यसअघि नेपाल नेदरल्यान्ड्ससँग दुई रनले पराजित भएको थियो ।
नामिबियासँग पहिलो खेलमा २० रनले पराजित हुँदा दोस्रो खेलमा तीन रनले हराएको थियो ।
.gif)