संसदभित्र गलत विषय उठे तत्काल प्रतिवाद गर्न एमाले सांसदलाई प्रधानमन्त्री ओलीको निर्देशन

सेतोमसी
बैशाख २०, २०८२ शनिवार

संसदभित्र गलत विषय उठे तत्काल प्रतिवाद गर्न एमाले सांसदलाई प्रधानमन्त्री ओलीको निर्देशन

अ +
अ
अ -

काठमाडौं । प्रधानमन्त्री एवम् नेकपा एमाले संसदीय दलका नेता केपी शर्मा ओलीले संसदभित्र आफ्नो प्रश्तुति प्रभावकारी बनाउन सांसदहरुलाई निर्देशन दिएका छन् । शनिवार बालुवाटारमा बसेको पार्टी संसदीय दलको बैठकमा बोल्दै उनले पार्टीको मर्यादा र अनुशासन कायम राख्दै प्रश्तुति प्रभावकारी बनाउन निर्देशन दिए । उनले सरकारले संसदमा प्रश्तुत गरेको आर्थिक वर्ष २०८२÷०८३ को नीति तथा कार्यक्रम सही भएको बताए ।

प्रधानमन्त्री ओलीले नीति तथा कार्यक्रम विकास र समृद्धिमा केन्द्रित रहेको भन्दै सांसदहरुले संसदमा बोल्दा जिम्मेवार हुनुपर्ने र राम्रोसँग अध्ययन गरेर मात्रै बोल्न निर्देशन दिए । ओलीले संसदमा बोल्नु अगाडि बुँदागत रुपमा टिपेर बोल्नुपर्ने बताए । विपक्षीहरुले बिरोध गर्ने, गलत नियतले बोल्ने भएकाले तत्काल प्रतिवाद गर्नसक्ने गरी सांसदहरुले तयारी गर्नुपर्ने उनको भनाई छ ।

‘प्वाइन्टहरु साथीहरुले लेखेर ल्याउनुहोला बोल्ने बेलामा, लेखेका प्वाइन्टहरु बोल्नुहोला ताकि कुरा नछुटोस्, नबिर्सियोस् भन्नका लागि । लेखेर ल्याएको बुँदाहरु प्रष्टताका साथ व्याख्या गर्न सक्नेगरी आउनुप¥यो ।’ उनले भने, ‘सिङ्गै वक्तव्य लेखेर ल्याएपनि हुन्छ । लेखेर ल्याएको वक्तव्यमा तत्काल उठेका प्रश्नको जवाफ दिन सकिँदैन, असहज हुन्छ । तत्काल उठेका कुराहरुको प्रतिवाद हामीले गर्नैपर्ने हुन्छ । हरेक सांसदहरुले गलत कुरामा उठेको खण्डनहरुमा पनि बोल्नैपर्ने हुन्छ ।’

सरकारले शुक्रवार आगामी आर्थिक वर्षको नीति तथा कार्यक्रम संसदको संयुक्त बैठकमार्फत सार्वजनिक गरेको छ । नीति तथा कार्यक्रममा सांसदहरुलाई संशोधन गर्न ७२ घण्टाको समय पनि उपलब्ध भइसकेको छ । सरकारको नीति तथा कार्यक्रमका बारेमा मिश्रित प्रतिक्रिया आएको छ ।