एशिया कप

भारत जारी एशिया कपको सुपर फोरमा

सेतोमसी
भाद्र ३१, २०८२ मंगलवार

अ +
अ
अ -

काठमाडौँ । भारत एसिया कपको आफ्नो अन्तिम लिग खेल अघि नै सुपर–४ मा प्रवेश गरेको छ । सोमबारको पहिलो खेलमा युएईले ओमानलाई ४२ रनले पराजित गरेपछि समूह ‘ए’ बाट भारत सुपर फोरमा पुगेको हो ।

यस नतिजाले पाकिस्तानलाई दबाबमा पारेको छ । अब पाकिस्तानले सेप्टेम्बर १७ मा युएईविरुद्ध कुनै हालतमा जित्नैपर्ने परिस्थिति बनेको छ ।

भारतले अहिलेसम्म खेलेका दुवै लिग खेल जित्दै ४ अंक हासिल गरेको छ र समूह ‘ए’ को शीर्ष स्थानमा उभिएको छ । टोलीले सेप्टेम्बर १९ मा ओमानसँग आफ्नो अन्तिम लिग खेल खेल्नुपर्नेछ । यस समूहबाट भारतसँगै पाकिस्तान वा युएईमध्ये एक टोली मात्र ४ अंक पुग्न सक्ने अवस्था छ ।

पाकिस्तानले अहिलेसम्म खेलेका दुई खेलमध्ये एक जितेको छ र एक हारेको छ । टोलीसँग २ अंक मात्रै छ । यदि पाकिस्तानले युएईसँग हार्यो भने, युएई ४ अंकसहित सुपर–४ मा प्रवेश गर्नेछ ।

युएईले यस सिजनको पहिलो खेल जितेको छ भने ओमानले लगातार दोस्रो हार बेहोरेको छ । पहिलो पटक एसिया कप खेलिरहेको ओमानले भारतविरुद्ध जित हात पारे पनि अधिकतम २ अंक मात्र प्राप्त गर्न सक्ने भएकाले प्रतियोगिताबाट लगभग बाहिरिसकेको छ ।