काठमाडौं । नेपाली कांग्रेसका केन्द्रीय सदस्य प्रदीप पौडेलले जेनजी विद्रोहलाई शंकाका रूपमा होइन, अवसरका रूपमा लिनुपर्ने बताएका छन् । सानेपामा जारी केन्द्रीय समिति बैठकमा उनले पुस्तान्तरण र रुपान्तरणसहितको प्रस्ताव प्रस्तुत गर्दै यसलाई आत्मसात् गरेमा कांग्रेसले आगामी चुनावमा बहुमत ल्याउन सक्ने दाबी गरे ।

उनका अनुसार जेनजी विद्रोहले उठाएका भ्रष्टाचार अन्त्य, सुशासन, रोजगारी र आर्थिक विकासजस्ता मुद्दा जायज छन् । ‘हामीले पूर्ण प्रजातान्त्रिक अभ्यास गर्न नसकेको र भ्रष्टाचार मौलाएको कारण युवा विद्रोह भएको हो,’ उनले भने, ‘यसलाई सम्बोधन गर्न सके कांग्रेसले सबैभन्दा बढी लाभ पाउनेछ ।’

पौडेलले पार्टीको कमजोरीको निष्पक्ष समीक्षा गरी सुधारको बाटो रोज्नुपर्ने बताए । उनले खर्चिलो संघीय संरचना पुनर्संरचना गर्दै संघीय संसद् २०१ सदस्य र मन्त्रिपरिषद् १५ सदस्यमा सीमित गर्न, प्रदेश सभा र सरकारको आकार ४० प्रतिशतले घटाउन र स्थानीय तह ४०० मा सीमित गर्न प्रस्ताव गरे ।

युवाको सहभागिता बढाउन उनले ‘डिजी युथ कांग्रेस’ गठन र वडादेखि केन्द्रसम्म युवा सहभागिता सुनिश्चित गर्ने योजना प्रस्तुत गरे । साथै, पार्टी सदस्यता प्रणाली एकरूप बनाउने, प्राइमरी प्रणालीबाट उम्मेदवार छनोट गर्ने र प्रधानमन्त्री उम्मेदवार पहिल्यै तोकेर चुनावमा जानुपर्ने सुझाव दिए ।

पौडेलले भ्रष्टाचारविरुद्ध शून्य सहनशीलता नीति अपनाउन, २०४६ पछि पदमा बसेका सबैको सम्पत्ति छानबिन गर्न र श्रोत पुष्टि नभएको सम्पत्ति राष्ट्रियकरण गर्नुपर्ने प्रस्तावसमेत राखे । उनले पार्टीको विशेष महाधिवेशन छिटो सम्पन्न गरी नयाँ पुस्तालाई नेतृत्वमा ल्याउनुपर्नेमा जोड दिए ।