प्राकृतिक प्रकोप

बंगलादेशमा ५.७ रेक्टरको भूकम्प, ढाकामा भवनको रेलिङ खस्दा ३ जनाको मृत्यु

एजेन्सी
मंसिर ५, २०८२ शुक्रवार

बंगलादेशमा ५.७ रेक्टरको भूकम्प, ढाकामा भवनको रेलिङ खस्दा ३ जनाको मृत्यु

अ +
अ
अ -

काठमाडौँ । बंगलादेशमा शुक्रबार बिहान गएको ५.७ म्याग्निच्युडको भूकम्पका कारण कम्तीमा ३ जनाको मृत्यु भएको छ भने कयौँ घाइते भएका छन् । भूकम्पको केन्द्रबिन्दु ढाकाबाट करिब ४० किलोमिटर पूर्व, नर्सिङ्दी नजिक रहेको युएस जियोलोजिकल सर्वे (USGS) ले जनाएको छ।

मध्य बिहान गएको कम्पनसँगै ढाकामा रहेका हजारौँ मानिस घर र अफिसबाट बाहिर निस्किए, किनकि भवनहरू केही सेकेन्डसम्म जोरले हल्लिएका थिए । पुराना घरहरूमा बनेका अस्थायी संरचना, रेलिङ र कमजोर भागहरू बढी प्रभावित भएको अधिकारीहरूले बताएका छन् ।

सबैभन्दा ठूलो क्षति ढाकाको एक ६ तले भवनको रेलिङ भत्किँदा भएको हो, जसले ३ जनाको ज्यान लियो । निर्माणाधीन भवनहरूमा खसेका सिमेन्टका ढिस्काहरू र इँटाका कारण अतिरिक्त घाइते भएको ढाका फायर डिपार्टमेन्टले जनाएको छ ।

अन्तरिम सरकार प्रमुख मुहम्मद युनुसले जनतालाई अफवाहमा नपर्न र शान्त रहन आग्रह गरेका छन् । उनले सम्बन्धित सबै क्षेत्रमा क्षति मूल्यांकन जारी रहेको बताउँदै भने “यदि आवश्यक परे थप निर्देशन औपचारिक च्यानल र आपतकालीन हाटलाइनमार्फत जारी गरिनेछ । हाम्रो प्रमुख प्राथमिकता नागरिकको सुरक्षामा केन्द्रित छ।”

देशका विभिन्न प्रभावित जिल्लामा उद्धार टोली परिचालन गरिँदैछ भने क्षतिको विस्तृत विवरण संकलन भइरहेको जनाइएको छ ।