धकधइ । राष्ट्रिय प्रजातन्त्र पार्टी(राप्रपा)बाट रुपन्देही १ का उम्मेदवार प्रज्जवलबोहरा (प्रशान्त) ले खुल्ला सिमालाई व्यवस्थित गरिनुपर्ने बताएका छन् । अवैध कारोबारमा नियन्त्रण, प्रभावकारी सुरक्षा, चेलीवेटी बेचबिखन नियन्त्रणका लागि भारतसँगको खुल्ला सिमा बाधक भएको भन्दै त्यसलाई व्यवस्थित बनाउने योजना अघि सारेका छन् ।

क्षेत्रका विभिन्न गाउँबस्ती र सीमावर्ती स्थलमा चुनावी घरदैलोका क्रममा बोहोराले अव्यवस्थित सिमाका कारण राष्ट्रिय सुरक्षा र स्थानीय अर्थतन्त्रमा गम्भीर संकट निम्त्याएको बताए । स्थानियवासी लाभान्वित हुन सक्नेगरी सिमा व्यवस्थापन गर्ने आफ्नो योजना रहेको सो अवसरमा उनले बताएका छन् । ‘नेपाल र भारत बिच रोटी बेटीको सम्बन्ध छ र भारतसँगको सम्बन्धलाई अझ बलियो बनाएर नेपालले धेरै फाइदा लिन सक्ने खालको योजना ल्याउनु पर्छ ।’ बोहराले भने, ‘तर खुल्ला सिमाको कारण भइरहेको बेथिति र असुरक्षाले हाम्रो समाज जर्जर बनेको छ । तस्करी र भन्सार छलीले यहाँका व्यवसायी पलायन हुने अवस्था पुगेका छन् ।’

खुल्ला सिमा व्यवस्थित नहुँदा नेपाललाई मात्र नभएर भारतलाइपनि समस्या हुने गरेको उल्लेख गर्दै उनले सीमालाई व्यवस्थीत बनाउन प्रविधिमैत्री र सुरक्षा व्यवस्थालाई प्रभावकारी बनाइनु पर्नेमा जोड दिए । सिमा व्यवस्थीत बनाउनुको अर्थ किसानले स्वदेशमा मलखाद नपाउँदा आफ्नोलागि ल्याएको १, २ बोरा मल रोक्ने, सामान्य नागरिकले ल्याउने दैनिक घरायसी प्रयोजनका सामान रोक्ने भने नभएको उनले जनाए ।

खुल्ला सिमाका कारण हुने तस्करीले देशको राजस्वमा ठुलो धक्का पुगेको र विना भन्सार भित्रने सामानका कारण इमानदारीपूर्वक कर तिरेर व्यवसाय गर्ने स्थानीय व्यापारीहरू मर्कामा परेको उनले बताए स उम्मेदवार बोहराले स्वदेशी लगानी र व्यवसाय जोगाउन भन्सार छली पूर्णतः बन्द गरिनुपर्नेमा जोड दिए । 

यसैगरि, खुल्ला सिमाले अपराधिक गतिविधि बढाएको र यसले जनधनको सुरक्षामा चुनौती थपेका कारण चेलिबेटी बेचबिखन र मानव ओसारपसार जस्ता जघन्य अपराध रोक्न कठिन भइरहेको उल्लेख गरे । 

सीमा क्षेत्रमा बसोबास गर्ने न्यून आय भएका नागरिकहरूले आफ्नो दैनिक गुजाराका लागि गर्ने स–साना ओसारपसारलाई राज्यले अपराधीकरण गर्न नहुने उनको भनाइ छ । ‘ठुला तस्कर सेटिङमा उम्किने तर परिवार पाल्नका लागि दुई–चार किलो सामान ल्याउने निम्न वर्गका जनताले सास्ती पाउने अवस्थाको अन्त्य हुनुपर्छ ।’ उनले भने, ‘राज्यको कानुन पनि पालना होस् र गरिबको चुलो पनि ननिभ्ने गरी सिमाना व्यवस्थीत गर्नु पर्छ ।’