देवदह । देवदह नगरपालिका वडा नं. ५ मा सञ्चालन भइरहेको ‘स्वच्छ टोल, सुन्दर देवदह’ अभियानलाई निरन्तरता दिइएको छ । सरसफाइ तथा वातावरण संरक्षणसँगै वडाभित्र टोल विकास संस्थाको पुनःगठन अभियानलाई पनि समानान्तर रूपमा अघि बढाइएको वडा कार्यालयले जनाएको छ ।

शनिबार वडा नं. ५ अन्तर्गत रहेका २१ वटा टोल विकास संस्थामध्ये १८ वटाले एकैसाथ बृहत् सरसफाइ अभियान सञ्चालन गरेको वडा अध्यक्ष गणेश डुम्रेले जानकारी दिए । बर्खायामलाई लक्षित गर्दै नाली सफा गर्ने, जाम भएका नाली खुलाउने, सडक तथा फुटपाथ आसपासका झाडी हटाउने, अव्यवस्थित फोहोर व्यवस्थापन गर्ने तथा विभिन्न स्थानमा वृक्षारोपण गर्ने कार्य सम्पन्न गरिएको उनले बताए ।

अभियानमा टोल विकास संस्थाका पदाधिकारी, स्थानीय बासिन्दा, जनप्रतिनिधि तथा स्वयंसेवकको उत्साहजनक सहभागिता रहेको थियो । अभियानले स्वच्छ, हराभरा र सुरक्षित वडा निर्माणमा सकारात्मक योगदान पुर्‍याएको जनाइएको छ । बाँकी रहेका टोल विकास संस्थाले पनि आफ्नो कार्यतालिका अनुसार आगामी दिनमा सरसफाइ अभियानलाई निरन्तरता दिने तयारी गरेको वडाको दावी छ ।

यसैक्रममा गुरुङटोला टोल विकास संस्थाले नगरपालिका जाने मूल सडक तथा आसपासका क्षेत्रमा 'विशेष' सरसफाइ कार्यक्रम गरेको छ । वडा अध्यक्ष गणेश डुम्रेको नेतृत्वमा संचालित सरसफाइ कार्यक्रममा गुरुङटोला टोल विकास संस्थाका अध्यक्ष श्यामकुमार अर्याल, सचिव तेजबहादुर क्षेत्रीलगायत टोलवासीको सहभागिता रहेको जनाइएको छ ।

यसैबीच, टोल विकास संस्थाको पुनःगठन अभियानअन्तर्गत असार २७ गते मितेरी टोल विकास संस्थाको पुरानो समिति विघटन गरी नयाँ कार्यसमिति चयन गरिएको छ ।

नवनिर्वाचित समितिको अध्यक्षमा कमला रेश्मी (कल्पना), उपाध्यक्षमा चेतप्रसाद रिमाल, सचिवमा रुमी सारु थापा, कोषाध्यक्षमा धनकुमारी गिरी (सीता) चयन भएका छन् । सदस्यमा रितु विक, मिना कुमारी थापा, ज्ञानबहादुर गुरुङ, मिना गिरी र शारदा भारती चयन भएका छन् ।