राजनीति

महानिरीक्षक कार्की स्वदेश फिर्ता

सेतोमसी
आषाढ ३१, २०८३ बुधवार

अ +
अ
अ -

काठमाडौँ । प्रहरी महानिरीक्षक दानबहादुर कार्की संयुक्त राष्ट्रसंघको प्रधान कार्यालय न्युयोर्कमा आयोजित पाँचौँ संयुक्त राष्ट्रसंघ प्रहरी प्रमुख सम्मेलनमा सहभागी भएर स्वदेश फर्किएका छन् ।

त्रिभुवन अन्तर्राष्ट्रिय विमानस्थलमा प्रहरी अतिरिक्त महानिरीक्षकहरू, नेपाल प्रहरीका केन्द्रीय प्रवक्ता प्रहरी नायब महानिरीक्षक अबि नारायण काफ्ले लगायत वरिष्ठ प्रहरी अधिकृतहरूले प्रहरी महानिरीक्षक कार्कीलाई स्वागत गरेका थिए ।

सम्मेलनका क्रममा प्रहरी महानिरीक्षक कार्की र सशस्त्र प्रहरी बलका महानिरीक्षक नारायणदत्त पौडेलले संयुक्त राष्ट्रसंघ तथा विभिन्न मित्रराष्ट्रका उच्चपदस्थ अधिकारीहरूसँग द्विपक्षीय भेटवार्ता गरेका थिए ।

सम्मेलनमा संयुक्त राष्ट्रसंघीय प्रहरीको भविष्य, नयाँ प्रविधिको उपयोग, अन्तर्राष्ट्रिय सहकार्य सुदृढीकरण, भाषा तालिममार्फत संयुक्त राष्ट्रसंघीय शान्ति मिसनलाई थप प्रभावकारी बनाउने उपाय तथा लैङ्गिक उत्तरदायी प्रहरी प्रणालीलगायत विषयमा छलफल भएको थियो ।

प्रहरी महानिरीक्षक कार्की र सशस्त्र प्रहरी महानिरीक्षक पौडेल सम्मेलनमा सहभागी हुन असार २१ गते अमेरिका प्रस्थान गरेका थिए ।