इजिप्टमा टेलिभिजन प्रस्तोता खलिफासहित १२ जनालाई मृत्युदण्ड

सेतोमसी
भाद्र २१, २०८३ आइतवार

इजिप्टमा टेलिभिजन प्रस्तोता खलिफासहित १२ जनालाई मृत्युदण्ड

अ +
अ
अ -

काठमाडौँ । इजिप्टमा टेलिभिजन प्रस्तोता सारा खलिफासहित १२ जनालाई लागुऔषधसम्बन्धी मुद्दामा दोषी ठहर गर्दै फाँसीको मृत्युदण्ड सुनाइएको छ ।

सरकारी समाचारपत्र अल अहरामका अनुसार उनीहरू बिक्री गर्ने उद्देश्यले लागुऔषध बनाउन प्रयोग हुने कच्चा पदार्थ आयात गर्ने आपराधिक समूहमा संलग्न रहेको आरोपमा दोषी ठहर भएका हुन् । उनीहरूबाट अवैध हतियार र गोलीगठ्ठासमेत बरामद भएको अदालतले जनाएको छ ।

३९ वर्षीया खलिफा अपराधसम्बन्धी टेलिभिजन कार्यक्रम ‘मिसन इम्पोसिबल’ का कारण परिचित थिइन् । उनले आफूमाथिका आरोप अस्वीकार गर्दै आएकी छन् । उनका वकिलले मृत्युदण्डविरुद्ध पुनरावेदन गर्ने बताएका छन् । मुद्दामा अन्य नौ जनालाई जन्मकैदको सजाय सुनाइएको छ भने सात जनालाई सफाइ दिइएको छ ।

अदालतमा सुनुवाइका क्रममा अधिकारीहरूले ७५० किलोभन्दा बढी लागुऔषध तथा त्यसको उत्पादनमा प्रयोग हुने आयातित कच्चा पदार्थ बरामद गरेको बताइएको थियो । अभियोजन पक्षले २० जना साक्षीको बयान तथा कुराकानी र श्रव्यदृश्य सामग्रीसहित विद्युतीय प्रमाण पनि पेस गरेको थियो ।

इजिप्टमा मृत्युदण्ड सुनाउनुअघि धार्मिक राय लिनुपर्ने कानुनी व्यवस्थाअनुसार सर्वोच्च धार्मिक अधिकारीको राय प्राप्त भएपछि गत महिना सुनाइएको फैसला औपचारिक रूपमा पुष्टि गरिएको हो । सन् २०२५ को एम्नेस्टी इन्टरनेसनलको प्रतिवेदनअनुसार इजिप्टमा त्यस वर्ष ४९२ वटा मृत्युदण्ड सुनाइएकोमा २३ जनालाई मृत्युदण्ड दिइएको थियो ।