आईविवीका डायपर बिक्रीबाट तीन दिनमा जुट्यो ५० लाख, सबै रकम बाढी प्रभावितकालाई सहयोग

सेतोमसी
भाद्र २६, २०८३ शुक्रवार

आईविवीका डायपर बिक्रीबाट तीन दिनमा जुट्यो ५० लाख, सबै रकम बाढी प्रभावितकालाई सहयोग

अ +
अ
अ -

काठमाडौं । आईविवी अष्ट्रेलियाका डायपर तथा बेबी केयर उत्पादन बिक्रीबाट तीन दिनमा संकलित ५० लाख रुपैयाँ भोटेकोशी बाढी प्रभावितका लागि सहयोग गरिएको छ ।

आईविवी अष्ट्रेलियाको आधिकारिक नेपाल वितरक शुभम् हेल्थ केयर प्रोडक्ट्स प्रा.लि.ले उक्त रकम प्रधानमन्त्री दैवी प्रकोप उद्धार कोषमा जम्मा हुने गरी अर्थमन्त्री स्वर्णिम वाग्लेलाई चेक हस्तान्तरण गरेको हो । चेक हस्तान्तरण कार्यक्रममा आईविवी नेपालकी प्रबन्ध निर्देशक ब्यूटी कुमारी सर्राफ सहभागी थिइन् ।

चेक हस्तान्तरण गर्दै सर्राफले विपद्को समयमा प्रभावित परिवारलाई सहयोग गर्न पाएकोमा गौरव लागेको बताइन् । उनले आईविवीका उत्पादन खरिद गर्ने उपभोक्ता, रिटेलर तथा डिलरहरूको साथ र विश्वासका कारण तीन दिनमै ५० लाख रुपैयाँ सहयोग गर्न सम्भव भएको बताइन् ।

उनले सहयोग रकम आईविवीको मात्र नभई उत्पादन खरिद गर्ने उपभोक्ता, रिटेलर र डिलरको समेत हिस्सा रहेको बताइन् ।

“यो डोनेसन आईविवीले होइन, तपाईँहरूले गर्नुभएको हो । यसमा मामुहरू सबैको हिस्सा छ, रिटेलरको मेहनत छ, डिलरको विश्वास छ,” सर्राफले भनिन् ।

सर्राफले आईविवीका उत्पादन खरिद गर्ने उपभोक्तालाई ‘मामुहरू’ भन्दै सहयोगका लागि धन्यवाद दिइन् । उपभोक्ताको साथबिना राहत कोषमा ५० लाख रुपैयाँ सहयोग गर्न सम्भव नहुने उनको भनाइ छ ।

“हिजोका दिनमा आईविवीका उत्पादन किनिदिएर हामीलाई मुनाफा नभएको भए यो रकम डोनेसन गर्ने हिम्मत हुने थिएन । अहिले तपाईँहरूले नकिनिदिनुभएको भए तीन दिनमै ५० लाख जम्मा पनि हुने थिएन,” उनले भनिन् ।

सर्राफले राहत अभियानको सुत्रधार बन्न पाउँदा आफूलाई गर्व लागेको बताउँदै विपद्को समयमा सहयोग गर्ने सबैप्रति आभार व्यक्त गरिन् ।