हिमाल आरोहण

हिम्लुङ हिमाल आधार शिविरमा हिमपहिरो, १० जना सम्पर्कविहीन

सेतोमसी
आश्विन ११, २०८३ आइतवार

हिम्लुङ हिमाल आधार शिविरमा हिमपहिरो, १० जना सम्पर्कविहीन

अ +
अ
अ -

काठमाडौँ । पश्चिम नेपालको हिम्लुङ हिमाल आधार शिविरमा आज बिहान ठूलो हिमपहिरो गएको छ। लगातारको वर्षा र भारी हिमपातपछि गएको हिमपहिरोले आधार शिविरमा रहेका पालहरू पुरिएका छन् ।

अभियान आयोजकका अनुसार हिमपहिरोले आधार शिविरका पालहरू बगाएपछि हिमालयन होलिडेज नेपालका कम्तीमा ८ जना आरोही तथा सहयोगी कर्मचारी र इम्याजिन नेपाल ट्रेक्सका २ जना भान्सा कर्मचारी सम्पर्कविहीन भएका छन् ।

अभियान आयोजकहरूले उनीहरूको खोजी तथा अवस्थाबारे जानकारी लिने प्रयास भइरहेको जनाएका छन् ।

एक्सपिडिसन अपरेटर्स एसोसिएसन नेपालका अनुसार हिम्लुङ क्षेत्रमा सञ्चालनमा रहेका अन्य कम्पनीका अधिकांश सदस्य तथा कर्मचारी भने मौसमसम्बन्धी चेतावनीपछि यसअघि नै सुरक्षित रूपमा तल्लो क्षेत्रमा झरिसकेका थिए ।