अशोक अधिकारी, सुनवल । सुनवल नगरपालिका वडा नम्बर ७ ज्यामिरे देखि अस्नैया सम्मको बाटोमा हिंड्न् मुस्किल पर्छ । बाक्लो धुलो र धुँवाले उक्त क्षेत्रका बासिन्दा निकै प्रताडित हुँदै आएका छन । तर, सरोकारवाला निकायहरु भने समस्या २० को १९ गराउने भन्दा पनि नदेखेझैं गरेर समस्या टारिहेका छन । 
 
करिब १० बर्ष अघि निर्माण 'ग्राबेल' भएको बाटो ज्यामिरे, सिसाहानी, अस्नैया हुँदै छ नम्बर चोकमा जोडिएको छ । ठुलो कारखानाको स्थापना संगै बाटोको क्षमता भन्दा बढि भार  कारखानाको कच्चा पदार्थ ओसारपसार गर्ने सवारी चलाउदा बाटो यस्तो हालत भएको स्थानीय बताउँछन। 

वडा नम्बर ७ को समस्या बाटोमात्र हैन । त्यस ठाउका दुई ठुला कारखानाबाट निस्केको प्रदुषित धुवा पनि हो । लक्ष्मी स्टिलबाट प्लास्टिस जलाएको धुँवा र पाल्पा सिमेन्टबाट किलिकर  सीमेन्टको धुलोले त्यस्  ठाउको जनजीवन प्रभावीत छ ।

सवारी आवागमन हुँदा अत्याधिक धुलो उड्ने गर्नाले बाटो हिड्न समेत समस्या भएको र  स्थानीय बिरामी समेत पर्न थालेको बिजय केसि ले  बताउँछन। 

धेरै पटक धुलो नियन्त्रणको लागि स्थानीयले नगरपालिकामा पहल गरेपनि काम भने अजै सुरु हुन सकेको छैन । निमार्णाधिन अवस्थामा रहेको उक्त सडकको मर्मतको पटक पटक  काम हुँदै आइरहेको छ। तर निमार्ण कार्यमा भइरहेको ढिलासुस्तीले गर्दा सडक आसपासका स्थानीयले समयमा अत्याधिक धुलो र बर्षातको समयमा हिलोको समस्या झेल्नु परिरहेको छ ।

यस विषयमा सुनवल नगरपालिका वडा नं. ७ का अध्यक्ष वसन्तराज दाहालसंग प्रतिक्रिया लिंदा उनले आफु उक्त समस्या संग परिचीत भएको र समाधानका लागि बारम्बार पहल गरेको बताए । लक्ष्मी स्टिल र पाल्पा सिमेन्टलाई यसबारे पटक पटक सचेत गराइएको र लिखित प्रतिबद्धता समेत गराइएको बताउँदै बाह्य शक्ति प्रयोग गर्दै उद्योगहरुले स्थानीय जनताको स्वास्थ्य समस्यामा खेलवाड गरिरहेको बताए । स्थानीयहरु बिरामी हुन थालेको कुरामा समेत सहमत हुदैं अध्यक्ष दाहालले उक्त धुलोको कारण आफ्नै आयु समेत घटिरहेको महसुस हुने बताए ।

जनचासो र  जनस्वास्थ्यसंग जोडिएको यस प्रकारका मुद्दामा सम्पुर्ण स्थानीयबासीको निरन्तर पहल रहिरहनु र स्थानीय निकाय तथा सरोकारवाला पक्ष समयमै सचेत हुनु जरुरी छ ।