एमालेको कार्यक्रममा आशनग्रहण र ब्याच–खादामा रोक

सेतोमसी
श्रावण ३२, २०८० बिहिवार

एमालेको कार्यक्रममा आशनग्रहण र ब्याच–खादामा रोक

अ +
अ
अ -

काठमाडौं । एमालेले पार्टीका बैठक र सार्वजनिक कार्यक्रमलाई भड्किलो र तामझाम गर्ने परम्परामाथि रोक लगाउँदै नयाँ शैली अपनाउने निर्णय गरेको छ । केन्द्रीय सचिवालयको मंगलबारको बैठकले मञ्चमा उद्घोषकबाहेक सबैलाई सहभागीकै पंक्तिमा राख्ने, मुख्य वक्ता र वक्ताबाहेक कसैलाई अतिथि नबनाउने तथा खादा–ब्याच केहीको पनि प्रयोग नगर्ने निर्णय गरेको हो ।

बुधबार पार्टीको अर्थ विभागले आर्थिक विषयमा र्‍याडिसन होटेलमा आयोजना गरेको अन्तरक्रियामा अध्यक्ष केपी ओलीले पार्टीले गरेको त्यस्तो निर्णयलाई कडाइका साथ लागू गराउन सर्कुलर पठाउने तयारी भइरहेको आयोजकलाई जानकारी गराए । यसअघि एमालेले भ्रातृ संगठनलाई कार्यक्रम भड्किलो नबनाउन निर्देशन गर्दै आएको थियो । पछिल्लो समय अनेरास्ववियुले मात्रै पार्टीको निर्देशनलाई पालना गर्दै खादा–ब्याच वितरणमा रोक लगाउँदै आएको छ ।

‘हिजो बसेको केन्द्रीय सचिवालय बैठकले नेपालमै बडा कष्ट हुने गरेको त्यो कष्ट हटाउने गरी एउटा निर्णय गरेको छ । खर्चपर्च केही नलाग्ने, तर एउटा महत्वको निर्णय । अबउप्रान्त धेरै आशनग्रहण नगराउने । सर्कुलर नआएको हुनाले तपाईंहरूले धेरै आशनग्रहण गराउनुभएको छ । अबउप्रान्त हामी यो आशनग्रहणको झन्झट गर्दैनौँ । नो आसन,’ ओलीले पार्टीको पछिल्लो निर्णयबारे भने, ‘सबै अघिपट्टि बस्ने, बोल्ने मान्छे आएर पोडिएमबाट बोल्छ, अरू सबै अगाडि बस्ने । त्यो तरिका हामीले अपनाउनुपर्छ । हामीले निर्णय गरिसकेका छौँ । त्यो सर्कुलर मात्र हुन बाँकी छ । यो निर्णय एमालेलाई मात्र होइन, अरूलाई पनि सजिलो हुन्छ ।’