पोखरा ल्याइएका मुर्रा राँगा २१ दिन क्वारेन्टिनमा राखिने, एउटाबाट वार्षिक २० हजार डोज बिर्य उत्पादन हुने

सेतोमसी
मंसिर १०, २०८० आइतवार

पोखरा ल्याइएका मुर्रा राँगा २१ दिन क्वारेन्टिनमा राखिने, एउटाबाट वार्षिक २० हजार डोज बिर्य उत्पादन हुने

अ +
अ
अ -

राजेश पराजुली, पोखरा । उन्नत जातको मुर्रा राँगो नेपालगञ्जको जमुनाह नाका, बुटवल हुँदै पोखरामा ल्याइएको छ । भारतले नेपाललाई अनुदानमा दिएका १५ वटा राँगा मध्ये ७ वटा पोखरामा ल्याइएको हो । पोखरामा ल्याइएका राँगालाई राष्ट्रिय पशु प्रजनन कार्यालय पोखरामा राखिएको छ । अब यी राँगाको बिर्य संकलन गर्नुअगाडि २१ दिन क्वारेन्टिनमा राखिने राष्ट्रिय पशु प्रजनन कार्यालय पोखराका प्रमुख पशु विकास अधिकृत डा.जगदीश पाण्डेयले बताए । एउटा राँगाबाट वार्षिक २० हजार डोज बिर्य उत्पादन हुने अनुमान गरिएको उनले जनाए ।

उन्नत जातको ७ वटा मुर्रा राँगो पोखरा ल्याइएपछि पोखरा र यस क्षेत्रका भैसीपालक कृषक लाभान्वित हुने पोखरा महानगरपालिकाका प्रमुख धनराज आचार्यले बताएका छन् ।

प्रमुख आचार्य सामाजिक सञ्जालमा लेख्छन्–‘भारतबाट उन्नत नश्ल र मुल्यका मुर्रा जातका राँगा ल्याउने काम पुरा भएको छ । १५ मध्ये ७ राँगा पोखरा स्थित पशु प्रजनन बिकास केन्द्र ( भेडिफारम) मा ल्याईएको छ । यसबाट पोखरा र यस क्षेत्रमा उच्च जात र नश्लको भैसि पालक कृषकहरु बिशेष लाभान्वित हुनुहुनेछ । यस अतुलनिय प्रयासको लागि सम्पूर्ण सहयोगी हातहरु प्रति हार्दिक आभार’ ।

प्रधानमन्त्री पुष्पकमल दाहाल प्रचण्डको गत जेठमा भएको भारत भ्रमणका क्रममा नेपाल–भारत कृषि तथा पशुपन्छीको क्षेत्रमा सहकार्यको समझदारी भएको थियो । सोहीअनुसार भारतले नेपालको दुग्ध र मासु विकासका लागि उन्नत जातको मुर्रा राँगा पठाएको हो ।