जसपाले भूमि सम्बन्धी अध्यादेशको विपक्षमा मतदान गर्ने

सेतोमसी सहकर्मी

जसपाले भूमि सम्बन्धी अध्यादेशको विपक्षमा मतदान गर्ने

अ +
अ
अ -

काठमाडौं । जनता समाजवादी पार्टी (जसपा)ले सरकारले ल्याएका छ वटा अध्यादेशमध्ये भूमिसम्बन्धी अध्यादेशको विपक्षमा मतदान गर्ने निर्णय गरेको छ ।

मंगलवार बसेको जसपा संसदीय दलको बैठकले अरु अध्यादेशको पक्षमा मतदान गर्ने निर्णय गरेपनि भूमि सम्बन्धी अध्यादेशमा राष्ट्रको हित विपरीतका प्रावधान राखिएको भन्दै विपक्षमा मतदान गर्ने निर्णय गरेको हो । जसपाका राष्ट्रिय सभा सांसद मृगेन्द्रकुमार सिंहका अनुसार स्वीकृतिका लागि अध्यादेश सदनमा पेश हुँदा भूमिसम्बन्धी अध्यादेशको विपक्षमा आफ्नो पार्टीले मतदान गर्ने बताए ।

संसद नचलिरहेको अवस्थामा सरकारले सहकारी सहित ६ वटा अध्यादेश जारी गरेको थियो । संघीय संसदको पहिलो बैठक बसेको माघ १८ गते ६ वटै अध्यादेश संसदमा पेश भएपनि स्वीकृतिका लागि भने पेश हुन सकेको छैन । प्रतिनिधि सभामा सत्तापक्ष कांग्रेस एमालेको दुईतिहाइ नजिक बहुमत भएपनि राष्ट्रिय सभामा भने जसपा निर्णायक हुँदा सरकारले स्वीकृतिका लागि अध्यादेश पेश गर्न सकेको छैन ।

यसअघि पटकपटक अध्यादेश स्वीकृतिका लागि पेश गर्ने तयारी गरेपनि जसपा अनिर्णित हुँदा अध्यादेशबारे अध्ययन गर्न जसपाले सांसद राजकिशोर यादवको नेतृत्वमा पाँच सदस्यिय कार्यदल बनाएर अध्ययन गरेको थियो । अध्ययनको सुझाव अनुसार मंगलवार बसेको संसदीय दलको बैठकले निर्णय गरेको सिंहले जानकारी दिए ।